ياپديغمزه هانگى دليل، هانگى حجّت بولمشلر كه، بو قدر مصرّانه صورييورلر؟ بن اون سنهدر إسپارطه ولايتنده شدّتلى ترصّد آلتنده بولونمشم. بر ايكى خدمتكار و اون گونده بر ايكى يولجيدن باشقه آدملرى گورمهين غريب، كيمسهسز، دنيادن اوصانمش، سياستدن غايت شدّتله نفرت ايتمش و قوّتلى سياسى مخالف جمعيتلرڭ نه قدر عكس العمللر ايله ضررلى و عقيم قالديغنى مكرّر مشاهداتله گورمش و كندى قوم و بيڭلر دوستلرى ايچنده، أڭ مهمّ فرصتده، سياسى جمعيت و جريانلرى ردّ ايتمش و قاريشمامش و ايمانِ تحقيقينڭ غايت قدسى و هيچ بر شيله زدهلنمهسى جائز اولميان خدمتى بوزمق و أغراضِ سياسى ايله چوروتمهيى أڭ بيوك بر جنايت تلقّى ايدهرك شيطاندن قاچار گبى سياستدن قاچان و اون سنهدن بَرى
﴿اَعُوذُ بِاللّٰه مِنَ الشَّيْطَانِ وَ السِّيَاسَةِ﴾
كندينه دستور ايدن و حيلهيى حيلهسزلكده بولان، عصبى و بِلا پروا أسرارينى فاش ايدن، اون سنه قوجه إسپارطه ولايتنڭ حسّاس و جسّاس مأمورلرينه بويله تشكيلات سزديرمهين بو آدمدن، «بويله بر تشكيلات وار و سياسى بر دولابى چويرييورسڭز» ديينلره قارشى، يالڭز بن دگل، بلكه إسپارطه ولايتى و بتون بنى طانييانلر، بلكه بتون أهلِ عقل و وجدان، اونلرڭ إفترالرينى نفرتله قارشيلار و «غرضكار پلانلر ايله اونى إتهام ايدييورسڭز» دييهجكلر.
ثانيًا: مسئلهمز ايماندر. ايمان اخوّتيله بو مملكتده و إسپارطهنڭ يوزده طقسان طوقوز آدملرى ايله اخوّتمز وار. حالبوكه جمعيت ايسه، أكثر ايچنده أقلّيتڭ إتّفاقيدر. بر آدمه قارشى، طقسان طوقوز آدم جمعيت اولماز. مگر غايت إنصافسز بر دينسز، هركسى (حاشا) كندى گبى دينسز توهّم ايدوب، بو مبارك و ديندار ملّتى تحقير ايتمك نيّتيله بويله إشاعه ايدر...