اوچنجى مادّه:
رسالۀ نورڭ مساعدۀ حكومت آلينمادن إنتشارى و حسّياتِ ايمانيهيى قوّتلشديرمسيله، ايلريده بلكه حكومتڭ سربستانه پرنسبلرينه سد چكر و أمنيتِ عموميهيى إخلال ايدر.
الجواب: رسالۀِ نور، نوردر. نوردن ضرر گلمز. سياست طوپوزينى اون اوچ سنهدن بَرى ألندن آتمشدر و بو وطنڭ و بو ملّتڭ حياتلرينڭ تمل طاشلرى اولان حقيقتِ قدسيهيى تثبيت ايدر و بو مبارك ملّتڭ يوزده طقسان طوقوزينه ضررسز منفعتى اولديغنه، أجزالرينى اوقويان بتون ذاتلرى إشهاد ايدهبيليرم. هايدى برى چيقسين، ديسين: «بونده بر ضرر گوردم.»
و ثانيًا: بنم مطبعهم يوق و متعدّد كاتبلرم يوق. بريسنى زور ايله بولابيليرم. و حسنِ خطّم يوق، ياريم اُمّىيم، بر ساعتده آنجق بر صحيفهيى چوق نقصان يازمله يازهبيليرم. مرحوم عاصم بك گبى بعض ذاتلر بنم ايچون بر يادگار اولارق گوزل يازيلريله يارديم ايتديلر. بنم، چوق حزين غربتمدهكى خاطراتمى يازديلر. صوڭره او أنوارِ ايمانيهيى دردينه تام درمان بولان بر قسم ذاتلر اونلرى اوقومق ايستديلر و اوقوديلر؛ حياتِ أبديهلرينه تام بر ترياق اولديغنى حقّ اليقين گورديلر، كنديلرينه إستنساخ ايتديلر.
ألڭزه گچن و نظرِ تفتيشڭزده بولونان «فهرسته رسالهسى» گوسترييور كه؛ رسالۀِ نورڭ هر بر جزئى، بر آيتِ قرآنيهنڭ حقيقتنى تفسير ايدر و خصوصًا أركانِ ايمانيهيه دائر آيتلرى اويله وضوحله تفسير ايدر كه، آوروپا فيلسوفلرينڭ بيڭ سنهدن بَرى قرآن عليهنده حاضرلادقلرى هجوم پلانلرينى و أساسلرينى بوزويور. شيمديلك ألڭزده إختيار رسالهسنڭ اون برنجى رجاسنده بيڭلر ايمانى و توحيدى برهانلردن بر تك برهان وار. نمونه ايچون اوڭا باقڭز، دقّت ايديڭز. دعوام طوغرى ميدر، ياڭليش ميدر آڭلارسڭز. هم بو وطنه و بو ملّته نه قدر منفعتلى اولديغنى، نمونه ايچون، رسالۀِ نورڭ أجزالرندن اولان إقتصاد رسالهسى و خستهلره ايماندن گلن