(مكتبِ فنونده و علومِ إسلاميهده غايت مدقّق و قِدَملى معلّملردن حسن فيضىنڭ بر شعرى)
حضرتڭزه بورادن آيريليركن سويلهمشدم
چكيلوب نورِ هدايت ينه زندان اولاجق
ينه فرقت، ينه حسرت، ينه خسران اولاجق
ينه سن، ياش يرينه قان آقيتوب آغلا گوزم
چونكه هجران طولو قلبم ينه هجران اولاجق
ينه گوچ وار دييه مجنونه خبر ويرمه صاقين
ينه ماتم، ينه زارى، ينه أفغان اولاجق
آچيلان اول گُلِ توحيد، صاراروب صولسه گرك
قپانوب كعبۀ عرفان، ينه ويران اولاجق
خبر آلدم كه يارين ياد اولاجقمش بزه يار
نه بيوك ياره كه، كيملر بوڭا درمان اولاجق
بو بيوك دردِ ألمدن كيمه شكوا ايدهيم
ايشيدن نالهمى، هپ بن گبى نالان اولاجق
او شفابخش اولان أنواريڭى سن چكسهڭ أگر
بڭا كيم نور ويرهجك، كيم بڭا لقمان اولاجق
او تميز پاك نَفَسڭ، آبِ حياتى بو چولڭ
اونى دور ايتمه كه هر فرد اوڭا ريّان اولاجق