عينًا قسطمونيدهكى طوقات يينلر گبى شبهه قالمامش؛ بش آدم، عينًا بوراده ده طوقات ييديلر.
سعيد النورسى
* * *
إستانبولده، قومونيستلر عليهندهكى حادثهيى گورن رسالۀ نور طلبهلرينڭ مكتوبندن بر پارچه
﴿بِاسْمِهٖ سُبْحَانَهُ﴾
عزيز قارداشلرم!
(لَهُ الْحَمْدُ وَ الْمِنَّةُ) دون، نورڭ معنوى بر فتوحاتى، بتون عظمت و دهشتيله إستانبولده گورولدى. كفرِ مطلقى دنيايه، خصوصًا عالمِ إسلامه يرلشديرمك ايستهين بر جمعيت و اونلرڭ ناشرِ أفكارى و مروّجِ آمالى اولان بر ايكى غزته مطبعهسى و كتبخانهسى طارماطاغين ايديلهرك؛ دينسز ياپدق، قومونيست ياپدق ظن ايديلن گنجلك و مكتبليلرڭ آغزيله و حركاتيله و فعللريله پروتستو ايديلدى. «قهر اولسون قومونيستلك» دييه بددعا ايديلدى. بو جمعيتڭ بيڭلر ليرا مادّى، ميليونلر ليرا ده معنوى ضررى اولدى.
أى نورجيلر! شيمدى مادّى إمكان حاصل اولمايور دييه اوزولمهيڭز. نورڭ فتوحاتى گنيش بر ساحهده دوام ايدييور. كلّى بر موفّقيت حاصل اولويور.
﴿هٰذَا مِنْ فَضْلِ رَبّٖى﴾
* * *