گليردى. ايكى سنه بويله دوام ايتدى؛ صوڭره قائمِمقام، إنسانلرله گوروشويور دييه جامعدن منع ايتدى. أميرطاغنده إقامتى زماننده باشده إسپارطه اولارق چوق يرلرده نور رسالهلرى أل يازيسيله چوغالتيلييوردى. رسالهلرى اوقويوب مستفيد اولانلردن، استادى گورمگه گلنلر پك چوقدى. فقط زيارته گلنلردن آز بر قسمى گوروشهبيلمگه موفّق اولوردى. داها زياده رسالۀِ نوره كمالِ صداقتله و إخلاصله خدمت ايتمگه قابليتلى اولانلر و صِرف ِﷲ ايچون محبّت و اخوّت طاشييانلر گوروشهبيلير؛ استادڭ درسنى، صحبتنى ديڭلهيهبيليردى. استاد، مختلف إستعدادده اولان هر زيارتجينڭ درجۀِ فهم و إدراكنه گوره قونوشور، نظرلرى رسالۀِ نوره و خدمتِ ايمانيهيه چويرر، رسالۀِ نور حقيقتلريله ايمانه خدمتڭ بو ملّته مادّةً و معنًا أڭ بيوك منفعتلرى تأمين ايدهجگنى دعوا و ايضاح ايدردى. گلن زيارتجيلر، مختلف خلق طبقهلرندن، گنجلردن، أهلِ علمدن ايدى. دڭزلى برائتندن صوڭره مأمورلر آراسنده بيوك إنتباه اولمش، نوره طلبه اولانلر چوغالمشدى.
استاد گلنلرله نه قونوشوردى؟
همان عموميتله، رسالۀِ نور خدمتنڭ يگانه مقصدى اولان ايمانڭ قوّتلنمهسنڭ وطن و ملّتى تهديد ايدن دينسزلك و قومونيستلك تهلكهسنه مانع اولديغنى؛ شيمدى أڭ ألزم وظيفهنڭ، فردلره و جمعيته دوشن خدمتڭ ايمانى قورتارمق و قوّتلنديرمك بولونديغنى؛ زمانڭ أڭ بيوك دعواسنڭ قرآنه صاريلمق اولديغنى، رسالۀِ نور بتون قوّتيله بو مسئلهيه حصرِ نظر ايتديگندن، وطن و ملّت دشمنلرى، گيزلى دينسزلر، بهانهلرله هجومه گچوب عليهده تحريكلرده بولوندقلرينى؛ «فقط بز مثبت حركت ايتمگه مجبورز. ألمزده نور وار، سياست طوپوزى يوق. يوز ألمز ده اولسه، آنجق نوره كافى گلير.» دييهرك نورڭ دين