ايشته بر نبذه بيان ايديلن أحوالى و خدمتلرى دلالتيله بو خارقه ذات، عادتا مختلف إستعداد و آيرى آيرى ذكا و قابليتلردن متشكّل بر جماعت ماهيتنده ايدى. إسلاميتڭ ظهورندن إعتبارًا ١٣٠٠ ييل ايچنده گلوب گچن و إسلاميت شجرۀِ نورانيهسنڭ چشيدلى چيچك و ميوهلرى اولارق عصرلرى تزيين ايدن عموم أهلِ حق و ذكاوتڭ كمالات و گوزللكلرينه صاحب اولمش، نشان و فورمالرينى طاقمش گبى ايدى. صانكه علوم و معارفِ إسلاميه، بو ذات واسطهسيله يڭى باشدن إحيا ايديلييوردى.
بيوك پيغمبرڭ درس و إرشاديله حقيقته اولاشان و كمالاتده ترقّى ايدن و هر برى جماعتِ إسلاميهدن بر طائفهيى دائرۀِ تنوير و إرشادنده يوروتن قدسى استادلر، عالم و مجتهدلر، آيرى آيرى مسلك و علملرينه بو ذاتى وارث تعيين ايتمشلر گبى؛ ماضينڭ بتون محاسن و مزيتلرينى گيينهرك عصريمزده اورتهيه چيقان بو خارقۀِ زمان سعيد النورسى حضرتلرى، بويلهجه قرآن نامنه رسالۀِ نورله گريشديگى دينى خدمت و جهادِ معنويسيله بر جماعتڭ، يوكسك بر هيئتڭ، بلكه معظّم بر اوردونڭ ياپابيلهجگى وظيفهلرى، كلّى خدمتلرى، إذنِ إلٰهى ايله ياپمشدر. إسلاميت نورندن و ايمان قارداشلغندن گلن بر قوّت و رابطه ايله تشكيل ايتديگى نور شاكردلرى شخصِ معنويسى، أهلِ ضلالتڭ جماعتله هجومنه مقابل چيقمش، بو صورتله مؤمنلرڭ نقطۀِ إستنادى، قيزيل تهلكهنڭ بو وطنى إستيلاسنه قارشى قرآنى بر سد و عالمِ إسلامڭ قهرمان تورك ملّتنه أسكيسى گبى محبّت، اخوّت و إتّفاقنڭ مدارى اولمشدر.
أوت سعيد النورسى، غايت جامع بر إستعداده مالك بر ذاتدر. بو إستعدادلرڭ هپسنده چوق ايلرى گيتمشدر. جزء ايله كلّى، آفاقڭ أڭ گنيش دائرهسى ايله أنفسى دائرهسنى، مثلا ذرّه ايله صمان يولنى برابرجه دقّتله تدقيق ايدر، اونلردهكى