عزيز، صدّيق قارداشلرم!
قدرِ إلٰهى عدالتى بزلرى دڭزلى مدرسۀِ يوسفيهسنه سَوق ايتمهسنڭ بر حكمتى، هر يردن زياده رسالۀِ نوره و شاكردلرينه هم محبوسلرى، هم أهاليسى، بلكه هم مأمورلرى و عدليهسى محتاج اولمالريدر. بوڭا بناءً، بز بر وظيفۀِ ايمانيه و اُخرويه ايله بو صيقنتيلى إمتحانه گيردك. أوت يگرمى اوتوزدن آنجق بر ايكيسى تعديلِ أركان ايله نمازينى قيلان محبوسلر ايچنده بردن رسالۀِ نور شاكردلرندن قرق ألليسى عمومًا بِلا إستثنا مكمّل نمازلرينى قيلمالرى، لسانِ حال و فعل ديليله اويله بر درس و إرشاددر كه، بو صيقنتى و زحمتى هيچه اينديرر، بلكه سَوْديرر. و شاكردلر أفعاللريله بو درسى ويردكلرى گبى، قلبلرندهكى قوّتلى تحقيقى ايمانلريله دخى بورادهكى أهلِ ايمانى أهلِ ضلالتڭ أوهام و شبهاتندن قورتارمهلرينه مدار چليكدن بر قلعه حكمنه گچهجگنى رحمت و عنايتِ إلٰهيهدن اُميد ايدييورز.
بورادهكى أهلِ دنيانڭ بزى قونوشمقدن و تماسدن منعلرى ضرر ويرمييور. لسانِ حال، لسانِ قالدن داها قوّتلى و تأثيرلى قونوشويور. مادام حپسه گيرمك تربيه ايچوندر. ملّتى سَوييورلرسه، محبوسلرى رسالۀِ نور شاكردلريله گوروشديرسونلر؛ تا بر آيده، بلكه بر گونده بر سنهدن زياده تربيه آلسينلر. هم ملّته و وطنه، هم كندى إستقباللرينه و آخرتنه منفعتلى برر إنسان اولسونلر. گنجلك رهبرى بولونسه ايدى، چوق فائدهسى اولوردى. إن شاء اللّٰه بر زمان گيرر.
سعيد النورسى
* * *