گورونويور.
﴿اَلْخَيْرُ فٖى مَا اخْتَارَهُ اللّٰهُ﴾
ديديرييور. أڭ زياده بنى دوشونديرن رسالۀِ نورى، أڭ غافل و دنياجه بيوك مقاملرده بولونانلره ده كمالِ دقّتله اوقوتديرييور، باشقه بر ساحهده فتوحاته ميدان آچييور. و أڭ زياده رقّتمه طوقونان و كندى ألممدن باشقه هر بريڭزڭ صيقنتيسندن باشمه طوپلانان بتون ألملره و تأسّفلره قارشى رمضانده، بر ساعتى يوز ساعت حكمنه گتيرن او شهرِ مباركده بو مصيبت دخى، او يوز ثوابى هر بر ساعتى اون ساعت درجهسنده عبادت ياپمقله بيڭه إبلاغ ايتديگندن، رسالۀِ نوردن تام درس آلان و دنيانڭ فانى و تجارتگاه اولديغنى بيلن و هر شيئى ايمانى و آخرتى ايچون فدا ايدن و بو درسخانۀِ يوسفيهدهكى موقّت صيقنتيلر دائمى لذّتلر و فائدهلر ويرهجكلرينه اينانان سزڭ گبى إخلاصلى ذاتلره آجيمق و رقّتدن آغلامق حالتنى، تبريك و ثباتڭزى غايت إستحسان و تقدير ايتمك حالتنه چويردى. بن ده
﴿اَلْحَمْدُ لِلّٰهِ عَلٰى كُلِّ حَالٍ سِوَى الْكُفْرِ وَالضَّلَالِ﴾
ديدم. بڭا عائد بو فائدهلر گبى هم اخوّتمزڭ، هم رسالۀِ نورڭ، هم رمضانمزڭ، هم سزڭ بو يوزده اويله فائدهلرى وار كه، پرده آچيلسه، «يا ربّنا! شكر. بو قضا و قدرِ إلٰهى، حقّمزده بر عنايتدر.» ديديرتهجك قناعتم وار.
حادثهيه سببيت ويرنلره عتاب ايتمهيڭز. بو مصيبتڭ گنيش و دهشتلى پلانى چوقدن قورولمشدى، فقط معنًا پك چوق خفيف گلدى. إن شاء اللّٰه چابوق گچر.
﴿عَسٰى اَنْ تَكْرَهُوا شَيْئًا وَهُوَ خَيْرٌ لَكُمْ﴾
سرّيله مأيوس اولمايڭز.
سعيد النورسى
* * *