آدمڭ ايماننى قوّتلنديرديگى جهتله يگرمى بيڭ حسنه و اييلك اولديغندن، ألبته او خطايى و سيّئهيى عفو ايتديرر...
بن شدّتلى خسته اولماسه ايدم داها قونوشهجقدم. سز خدمتكارلرم تصحيح و إصلاح ايدرسڭز. حتّى مناسب گورسهڭز، معنًا پوليسلرڭ بر وظيفهسنى گورن رسالۀِ نورڭ آسايش خدمتنده پوليسلره بيوك بر قوّت اولان درسلرينه پوليسلر هركسدن زياده طرفدار اولمق لازم گليركن، شيمدى رسمًا تحرّى مأمورى صورتنده پوليسلك عليهنده اولان بو خدمتى پوليسلره ويرمگه روحم راضى دگل. اونلره عمومًا حقّمى حلال ايتديگمى سويلرسڭز.
سادسًا: شدّتلى بر تأسّفله ليلۀِ معراج وقتنده معراجِ شريف، شهورِ ثلاثه حرمتنه وسيله بكلركن، تاريخچۀِ حيات حسبيله تحرّى حادثهسى شدّتلى بر كدر ويردى. «صدقه بلايى دفع ايدر» مئالندهكى حديثِ صحيحڭ حكميله، رسالۀِ نور آناطولى ايچون بلالرى دفع ايدر بر صدقه حكمنه گچديگى؛ اوڭا برائتلر و سربستيتلر ويريلديگى زمان بلالرڭ دفع ايديلمسى، اوڭا هجوم ايديلديگى زمان بلالرڭ گلمهسى يوز حادثهسى وار كه؛ بعضًا زلزله و فورطنهلرله قيد ايديلديگى گبى، بو دفعه ده حياتمده گورمهديگم تحت الصّفر اون سكز درجهيه ياقين بر صوغوق، تعرّض و تحرّينڭ عين وقتنده گلدى.
استاديمز شدّتلى خستهلغندن فضله قونوشامدى. خسته حالنده خدمتكارينه ديدى: مراق ايتمهملرى ايچون براىِ معلومات بعض دوستلره و بعض رسمى ذاتلره گوندررسڭز.
شدّتلى خسته استاديمزڭ خدمتكارى
أوت، خدمتكاريمڭ يازديغى طوغريدر.
سعيد النورسى
* * *