ايدينمشلردر. رسالۀِ نور دعواسى، رضاىِ إلٰهى دعواسى اولديغى ايچوندر كه، حميتِ إسلاميهيه مالك ممتاز آووقاتلر، رسالۀِ نورڭ فخرى آووقاتى اولمق و ديندار حقپرست مجاهد محرّرلر، دنيايى إستيلا ايدهجك نورڭ إعلانندن حصّهدار اولمق شرف و نعمتنه مظهر اولمشلردر. رسالۀِ نورڭ نشريات و فتوحاتى و تأثيراتى؛ سسسز، بيوك بر إحتشامله محتشم بر بهار موسمنده إنتشار ايدن موجودات گبيدر.
ايشته أى رسالۀِ نور گبى حدسز حمد و ثنالره شايسته اولان بر نعمتِ عظيمهيه نائل اولان نور قارداشلريمز! بويله بر داهئِ أعظمڭ، بويله بر متفكّرِ أكبرڭ، بويله بر مؤلّفِ إسلامڭ و علومِ أوّلين و الآخرينه واقف بويله بر علاّمۀِ عصرڭ، بويله بر مجاهدِ أكبرڭ، بويله بر صاحبِ زهد و تقوانڭ، حقائقِ ايمانيهنڭ وارلغنده عادتا تجسّم ايدن بويله بر عبدِ كلّينڭ، رضاىِ إلٰهيدن باشقه هيچ بر شيئه إلتفات ايتمهين و أعظمى إخلاصڭ مظهرى اولان بويله بر تلميذِ قرآن و خادمِ إسلامڭ و «بر فردڭ ايماننى قورتارمق ايچون جهنّمه ده آتيلمغه حاضرم» ديين بويله بر خلاصكارِ ايمانڭ و إعدام ايچون سَوق ايديلديگى ديوانِ حربِ عُرفيده «سن ده مرتجعسڭ» إتهامنه قارشى «أگر مشروطيت بر فرقهنڭ إستبدادندن عبارت ايسه، بتون إنس و جنّ شاهد اولسون كه بن مرتجعم. بيڭ روحم ده اولسه، قرآنڭ بر تك مسئلهسنه هپسنى فدا ايتمگه حاضرم.» ديين و برائتندن صوڭره ده تشكّر ايتميهرك، بايزيد ميدانندهكى غلبهلكده «ياشاسين ظالملر ايچون جهنّم! ياشاسين ظالملر ايچون جهنّم!» دييه باغيرهرق ايلرلهين و إمحا پلانيله ويريلديگى محكمهلرده يگرمى درت سنه أوّل «أى ملحدلر! أى زنديقلر! سعيد، أللى بيڭ نفر قوّتنده ديمشسڭز... ياڭليشسكز... قرآنه و ايمانه خدمتم جهتيله أللى بيڭ دگل، أللى ميليون قوّتندهيم! تيترهيڭز! حدّيڭز وارسه ايليشڭز!»، «بنم ئولومم سزڭ باشڭزده بومبا گبى پاطلايوب، باشڭزى طاغيداجقدر. طوپراغه آتيلان بر تخمڭ يوزر