نوره عائددر. رسالۀِ نورڭ نشرندهكى خارقه موفّقيت ايسه، رسالۀِ نور طلبهلرينه عائددر. يالڭز شو قدر وار كه، شدّتلى إحتياجمه بناءً جنابِ حق، قرآنِ حكيمدن بڭا علاج و ترياقلرى إحسان ايتدى؛ بن ده قلمه آلدم. هر ناصلسه، بو زمانده برنجى ترجمانلق وظيفهسى بڭا دوشمش. بن ده رسالۀِ نورڭ طلبهسىيم. بر رسالهيى شيمدىيه قدر يوز دفعه اوقوديغم حالده ينه اوقومغه محتاج اولويورم. بن سزلرڭ درس آرقداشڭزم.» دير.
بديع الزمان سعيد النورسىنڭ جهانشمول قرآن و ايمان و إسلاميت خدمتندهكى مستثنا موفّقيت و ظفرينڭ و رسالۀِ نوردهكى قوّتلى تأثيراتڭ سرّى: كنديسنڭ إخلاصِ أتمّى قزانمش اولماسيدر. يعنى، يالڭز و يالڭز رضاىِ إلٰهىيى أساس مقصد ايدينمشدر. بو خصوصده: «مسلگمزڭ أساسى، أعظمى إخلاص و تركِ أنانيتدر. إخلاصلى بر درهم عمل، إخلاصسز يوز بطمان عمله مرجّحدر. إنسانلرڭ مادّى معنوى هديهلرندن، حرمت و توجّهِ عامّهدن، شهرتدن شدّتله قاچييورم.» دير. زيارتجى قبول ايتممهسنڭ بر حكمتى ده بو سرّ اولسه گرك. هم إخلاصه ويرديگى غايت فضله أهمّيت، يوز اوتوز پارچه أثرندن يالڭز إخلاص رسالهسنڭ باشنه، «لا أقل هر اون بش گونده بر دفعه اوقونمهليدر» قيدينى قويمهسندن ده آڭلاشيلييور. «بيوك محكمه مدافعاتى» كتابنده: «رسالۀِ نور، دگل دنيايه، كائناته ده آلَت ايديلهمز؛ غايهمز، رضاىِ إلٰهيدر.» ديمشدر.
ايشته بو سرِّ إخلاصدندر كه، إمامِ غزالى (رض) گبى أڭ مشهور إسلام حكمالرينڭ أثرلرينى تتبّع ايدن محقّق و مدقّق بر أهلِ علم دييور كه:
رسالۀ نوردن اوقوديغم بر صحيفهنڭ بڭا ويرديگى إستفاده، ديگر أثرلرڭ اون صحيفهسندن داها فضلهدر.