بوندن اون اوچ سنه أوّل، «دار الحكمة الإسلاميه» أعضاسندن ايكن، كوچكدن بَرى شيمدىيه قدر إذنِ إلٰهى ايله اونڭ بر معينى و ناصرى و محافظى اولان قطبِ ربّانى و قنديلِ نورانى عبد القادرِ گيلانى (رض) حضرتلرينڭ فتوح الغيب رسالهسنى تفألاً آچديغى أثناده،
﴿اَنْتَ فٖى دَارِ الْحِكْمَةِ فَاطْلُبْ طَبٖيبًا يُدَاوٖى قَلْبَكَ﴾
عبارهسى چيقدى. او عباره، اونڭ حقّنده پك معنيدار اولارق، أسكى سعيدى (رض) يڭى سعيده (رض) چويرمسنه سببيت ويرمشدر. أسكى سعيد اولديغى زمانلرده، إنگليزلرڭ دينى سؤاللرينه غايت لطيف و مسكت بر جواب ويرمشدر. و علمِ منطقده، ابن سينانڭ تأليفاتنى گچهجك «تعليقات» نامنده خارقه بر رسالهسى وار. اشكالِ منطقيهيى قياسِ إستقرائى جهتيله اون بيڭه قدر إبلاغ ايدوب، هيچ بر عالمڭ يتيشهمديگى بر درجۀِ إحاطه گوسترمش. «سنوحات» إسمنده بر رسالهسنده گوردم كه، رسولِ أكرم عليه الصلاة والسلام، عالمِ معناده، بر مدرسهده اوڭا درس ويرديگنى گورمش. او درسِ معنوىيه بناءً «إشارات الإعجاز» نامندهكى خارقه تفسيرى يازمش. بڭا بر گون ديدى كه:
«حربِ عمومى حادثات و نتائجلرى مانع اولماسه ايدى، إشارات الإعجازى اللّٰهڭ إذنيله آلتمش جلد يازاجقدم. إن شاء اللّٰه رسالۀ نور، أخيرًا او متصوّر خارقه تفسيرڭ يرينى طوتهجق.»
استادمله يدى سكز سنه مصاحبتم أثناسنده مهمّ مشهوداتم چوقدر. فقط
﴿اَلْقَطْرَةُ تَدُلُّ عَلَى الْبَحْرِ﴾
موجبنجه، دريايه دلالت مقصديله بو فقره كافى گورولدى. چونكه استادمدن إفتراق زمانى ايدى، عجله يازدم. استادم،
﴿وَ الصَّاحِبِ بِالْجَنْبِ﴾
آيتنڭ سرّيله چوق دفعه يانلرنده بنى مصاحب بولمق حقّنى و توجّه دعاسيله يرينه گتيرهجكلرينه أمينم.
حافظ خالد (رح)
* * *