صاقلانسين و تأثير صاحبى اولوب مداخله ايتسين و نه ده تصادفڭ حقّى وار كه، او حسّاس ميزانِ حكمت دائرهسندهكى ايشلرينه قاريشسين. رسالهلرده يگرمى يرده قطعى حجّتلرله تصادفى و طبيعتى نفى ايتميشز و قرآن قلنجيله إعدام ايتمشز، مداخلهلرينى محال گوسترمشز. فقط ربوبيتِ عامّهدهكى دائرۀِ أسبابِ ظاهريهده، أهلِ غفلتڭ نظرنده حكمتى و سببى بيلينمهين ايشلرده، تصادف نامنى ويرمشلر. و حكمتلرى إحاطه ايديلمهين بعض أفعالِ إلٰهيهنڭ قانونلرينى (طبيعت پردهسى آلتنده گيزلنمش) گورهمهمشلر، طبيعته مراجعت ايتمشلر.
ايكنجيسى، خصوصى ربوبيتيدر و خاص إلتفات و إمدادِ رحمانيسيدر كه، عمومى قانونلرڭ تضييقاتى آلتنده تحمّل ايدهمهين فردلرڭ إمدادينه رحمٰن رحيم إسملرى إمداده يتيشيرلر. خصوصى بر صورتده معاونت ايدرلر، او تضييقاتدن قورتاريرلر. اونڭ ايچون هر ذىحيات، خصوصًا إنسان، هر آنده اوندن إستمداد ايدر و مدد آلابيلير.
ايشته بو خصوصى ربوبيتندهكى إحساناتى، أهلِ غفلته قارشى ده تصادف آلتنه گيزلنمز و طبيعته حواله ايديلمز.
ايشته بو سرّه بناءًدر كه؛ إعجازِ قرآن و معجزاتِ أحمديهدهكى إشاراتِ غيبيهيى، خصوصى بر إشارت تلقّى و إعتقاد ايتمشز. و بر إمدادِ خصوصى و معنّدلره قارشى كندينى گوسترهجك بر عنايتِ خاصّه اولديغنى يقين ايتدك. و صِرف ِﷲ ايچون إعلان ايتدك. قصور ايتمشسهك اللّٰه عفو ايتسين. آمين.
﴿رَبَّنَا لَا تُؤَاخِذْنَٓا اِنْ نَسٖينَٓا اَوْ اَخْطَاْنَا﴾
* * *