عالمڭ إعتقادلرينى دوزلتهجك، ظلمتى إزاله ايدهجك بر مشعلۀِ هدايتى حامل ايدى. وظيفهسى و خدمتى، بتون إنسانلرڭ ايكى جهانه عائد سعادت و رفاهنى تضمّن ايتديگى ايچون بر جهد و عزم ايچنده بولونويوردى.
* * *
استادڭ بارلادهكى إقامتگاهى، ايكى اوطهدن عبارت بر أودر. أساسًا مستقل بر أوى و ير يوزنده تحتِ تصرّف و تملّكنده بر قاريش يرى دخى يوقدر. بارلاده سكز سنه مدّتله إقامت ايتديگى أو، اوچ يوز أللى ميليون أهلِ إسلامڭ مركزى حكمنده ايلك درسخانۀِ نوريهسيدر. بو درسخانۀِ نوريهنڭ آلتنده، دائمى آقان بر چشمه واردر. و اوڭنده، درسخانۀِ نوريهيه بتيشيك چوق قالين و اوچ ستون حالنده سمايه يوكسهلن غايت محتشم بر چنار آغاجى واردر. چنار آغاجنڭ داللرى آراسنده بر قولبهجك ياپيلمشدر. بوراسى، حضرتِ استادڭ بهار و ياز موسملرندهكى إستراحتى و وظيفۀِ تفكّريه و عبوديتى ايچون أڭ مناسب بر منزلدر. استادڭ صدّيق خدمتكارلرى، طلبهلرى و بارلا أهاليسى دييورلر كه: «استادى، گيجهلرى، درسخانۀِ نوريهنڭ اوڭندهكى بر شجرۀِ مباركه اولان چنار آغاجنڭ داللرى آراسنده بولونان قولبهجكده صباحلره قدر تسبيحات ايله، أذكار ايله ترنّم ايدر گوروردك. هله بهار و ياز موسملرنده بو محتشم آغاجڭ بيڭلرجه داللرى آراسنده شوق و جذبه ايچنده اوچوشان قوشلر آراسنده استادڭ بويله صباحلره قدر چاليشماسنى گوروردك ده؛ نه زمان اويور، نه زمان قالقار بيلهمزدك.»
استاد چوق خسته اولور، چوق وقتلرى ده خستهلق و صيقنتى ايله گچردى. پك آز ير، او ده بر پارچه چوربا گبى محدود بر شيدى. گيجهلرى، قرآنِ كريمدن ورد ايدنديگى سورهلرى و رسولِ أكرم عليه الصلاة والسلامڭ مناجاتِ مشهورهسى اولان جوشن الكبير نامندهكى مناجاتنى و شاهِ گيلانى و شاهِ نقشبند