بديع الزمان سعيد النورسىنڭ آفيون حپسخانهسنده تجريدِ مطلقده ايكن طلبهلرينه يازديغى مكتوبلردن بعض قسملر
﴿بِاسْمِهٖ سُبْحَانَهُ﴾
عزيز، صدّيق قارداشلرم!
سزى تعزيه دگل، بلكه تبريك ايدييورم. مادام قدرِ إلٰهى بزى بو اوچنجى مدرسۀِ يوسفيهيه بر حكمت ايچون سَوق ايتدى و بر قسم رزقمزى بزه بوراده يديرهجك و رزقمز بزى بورايه چاغيردى و مادام شيمدىيه قدر قطعى تجربهلرله
﴿عَسٰٓى اَنْ تَكْرَهُوا شَيْئًا وَهُوَ خَيْرٌ لَكُمْ﴾
سرّينه عنايتِ إلٰهيه بزى مظهر ايتمش و مادام مدرسۀِ يوسفيهدهكى يڭى قارداشلريمز هركسدن زياده نورلردهكى تسلّىيه محتاجدرلر و عدليهجيلر، مأمورلردن زياده نور قاعدهلرينه و سائر قدسى قانونلرينه إحتياجلرى وار و مادام نور نسخهلرى پك كثرتله خارجدهكى وظيفهڭزى گورويورلر و فتوحاتلرى توقّف ايتمييور و مادام بوراده هر بر فانى ساعت، باقى عبادت ساعتلرى حكمنه گچر، ألبته بز بو حادثهدن (مذكور نقطهلر ايچون) كمالِ صبر و متانت ايچنده مسرورانه شكر ايتمهمز لازمدر. دڭزلى حپسنده تسلّى ايچون يازديغمز بتون او كوچك مكتوبلرى سزه ده عينًا تكرار ايدرم. إن شاء اللّٰه او حقيقتلى فقرهلر سزى ده متسلّى ايدرلر.
سعيد النورسى
* * *