بن يگرمى آى تجريدِ مطلقده طورديريلديغم حالده يالڭز اوچ درت ساعت بر ايكى آرقداشمه إذن ويريلدى. مدافعاتمڭ يازيسنده آز بر پارچه يارديملرى اولدى. صوڭره اونلر ده منع ايديلدى. پك غدّارانه معاملهلر ايچنده جزالانديرديلر. مدّعينڭ بيڭ درهدن صو طوپلامق نوعندن، ياڭليش معنا ويرمكله و إفترالر و يالان إسنادلرله غرضكارانه و اون بش صحيفهسنده سكسان بر خطاسنى إثبات ايتديگم عليهمزدهكى إتهامنامهلرينى ديڭلهمگه بزى مجبور ايتديلر. بنى قونوشديرمديلر. أگر قونوشديرسهلردى دييهجكدم:
هم دينڭزى إنكار، هم أجداديڭزى ضلالتله تحقير ايدن و پيغمبريڭزى (عصم) و قرآنڭزڭ قانونلرينى ردّ ايدوب قبول ايتمهين يهودى و نصرانى و مجوسيلره، خصوصًا شيمدى بولشويزم پردهسى آلتندهكى آنارشيست و مرتد و منافقلره (حاشيه) حرّيتِ وجدان، حرّيتِ فكر بهانهسيله ايليشمديگڭز حالده و إنگليز گبى خرستيانلقده متعصّب، جبّار بر حكومتڭ دائرۀِ ملكنده و حاكميتنده، ميليونلرله مسلمانلر هر وقت قرآن درسيله إنگليزڭ بتون باطل عقيدهلرينى و كفرى
___
(حاشيه): يا استاد! دگل يگرمى ميليون، اوچ يوز أللى ميليون إنسانلرڭ مادّى و معنوى حقوقنى، قرآنڭ نوريله ِﷲ ايچون مدافعه ايتمشسڭ. ِﷲ ايچون اولديغنه دليل، جنابِ حق سنى قرآنڭ خدمتنده موفّق أيلدى. موسى عليه السلام، فرعونڭ ظلمندن نجات بولديغى گبى؛ رسولِ أكرم عليه الصلاة والسلام ده، منافقلرڭ لاشهلرينى گوروب، خصوصًا منافقلرڭ رئيسنى، مبارك كندى أليله گبرتهرك جهنّمه گوندرديگى گبى؛ رسالۀِ نور ده، أسكيشهرده رسالۀِ مناجات؛ دڭزليده ميوه رسالهسى و حجّتى؛ آفيونده بو عرضحال ايله، زندقهنڭ كفرِ مطلقنڭ و شقيلرڭ جانلرينى جهنّمه گوندردى. پرنسبلرينى، رژيملرينى ييرتهرق دنيانڭ هر كوشهسنده إنتشار ايتدى. الحمد لِلّٰه..
كوچك على