بنى إعدام ايله محكوم ايتسهلر؛ شاهد اولڭز، بن حقّمى اونلره حلال ايدييورم. چونكه بز خدمتكارز. رسالۀِ نورڭ وظيفهسى، ايمانى قوّتلنديروب قورتارمقدر. دوست و دشمنى تفريق ايتميهرك، خدمتِ ايمانيهيى هيچ بر طرفگيرلك گيرميهرك ياپمغه مكلّفز.
ايشته أى هيئتِ حاكمه؛ بو حقيقته بناءً رسالۀِ نورڭ جرح ايديلمز قوّتلى حجّتلرى ألبته محكمهده قلبلرى كندينه چويرمش، عليهمده نه ياپسهڭز بن حقّمى حلال ايدرم، گوجنمم. بونڭ ايچوندر كه؛ أشدِّ ظلم ايله بر أشدِّ إستبداد طرزنده شخصمى هيچ عمرمده گورمهديگم إهانتلرله چوروتمكله طماريمه طوقونديريلديغى حالده تحمّل ايتدم. حتّى بددعا ده ايتمدم. بزه قارشى بتون إتهاملره و بتون إسناد ايديلن صوچلره قارشى ألڭزدهكى رسالۀِ نورڭ مجموعهلرى، بنم مقابله ايديلمز مدافعهنامهم و جرح ايديلمز إعتراضنامهمدرلر.
مدارِ حيرتدر كه: مصر، شام، حلب، مدينۀِ منوّره، مكّۀِ مكرّمه علاّمهلرى و ديانت رياستنڭ مدقّق خواجهلرى او نور مجموعهلرينى تدقيق ايدوب هيچ تنقيد ايتميهرك تقدير و تحسين ايتدكلرى حالده، إدّعانامهيى عليهمزه طوپلايان ذكاوتلى ذات؛ قرآنى يوز قرق سورهدر دييه عجيب و پك ظاهر بر ياڭليشى ايله نه درجه سطحى باقديغى و رسالۀِ نور بو آغير شرائط ايچنده و بنم غربت و كيمسهسزلگم و پريشانيتمده و عليهمده دهشتلى هجوملرله برابر يوز بيڭلر أهلِ حقيقته كندينى تصديق ايتديرديگى حالده، داها قرآنڭ قاچ سورهسى وار اولديغنى بيلمهين او إدّعاجى ذات «رسالۀِ نور قرآنڭ تفسيرينه و حديثلرڭ تأويلنه چاليشماسيله برابر بر قسمنده اوقويانلره بر شى اوگرتمه باقيمندن علمى بر ماهيت و قيمت طاشيمديغى گورولمكدهدر.» دييه تنقيدى نه درجه قانوندن، حقيقتدن، عدالتدن و حقدن اوزاق اولديغى آڭلاشيلييور.