سورهلرڭ تعدادنده أهمّيتله إشارت ايتديگى رسالۀِ جامعه اولان اوتوز ايكنجى سوزه ينه نظرِ دقّتى قوّتلى جلب ايتمك ايچون (ذَيْمُوخٍ اَشْمُوخٍ بِهِ الْكَوْنُ عُمِّرَتْ) و بر نسخهده (بِهِ الْكَوْنُ عُطِّرَتْ) يعنى إسمِ عدل و إسمِ حَكمڭ تجلّيسيله و عدالت و ميزانيله و إنتظام و حكمتيله دنيا تعمير ايديلير، تخريبدن قورتولور. ايكنجى نسخه ايله او ايكى إسمڭ رايحۀِ طيّبهسيله و چوق خوش قوقولريله، دنيا گوزل قوقولر آلير. عطّار دكّانى گبى رايحۀِ طيّبه ويرر.
ايشته إسمِ عدل و إسمِ حَكمڭ پارلاق بر آيينهلرى و بر تفسيرلرى حكمنده اولان اوتوز ايكنجى سوزه پارمق باصييور و معناىِ مجازى صورتنده إفاده ايدر. (ذَيْمُوخٍ) كلمهسنڭ تكراريله سوزلر اوتوز اوچ ايكن بر مرتبهسى مكتوبلردن عبارت اولديغنه و اوتوز ايكنجى سوز صوڭ مرتبهسى بولونديغنه ايما ايدر. بن سُريانى كلمهلرينڭ معنالرينى تماميله بيلهمديگمدن و إمامِ غزالى (رض) دخى تماميله ايضاح ايتمديگندن حضرتِ إمامِ علىنڭ (رض) او كلمهلر ايله سائر رسالهلره إشاراتنى شيمديلك بيراقييورم.
بشنجى رمز:
مادام جلجلوتيه وحى ايله پيغمبر عليه الصلاة والسلامه نازل اولمش. و علاّم الغيوبڭ علميله إفادۀِ معنا ايدر. هم مادام جلجلوتيه (اَقِدْ كَوْكَبٖى) و (تُقَادُ سِرَاجُ النُّورِ) فقرهلرنده معناىِ مجازى ايله او قصيدهنڭ حقيقتنى إثبات ايدن رسالۀِ النوره صريحًا و اونڭ اون اوچ أهمّيتلى رسالهلرينه إشارةً خبر ويرمكله برابر، (فَيَا حَامِلَ الْاِسْمِ الَّذٖى جَلَّ قَدْرُهُ) ده دخى او قصيدهنڭ بر أساسى اولان (اَلْاِسْمُ الْمُعَظَّمُ) ايله چوق إشتغال و إستمداد ايدن رسالۀِ النور مؤلّفنه و بونڭ اون اوچ أهمّيتلى واقعاتِ حياتنه ايماءً، رمزًا، إشارةً