أهمّيتنى و آفاتڭ دفعنه وسيله اولديغنى گوسترمشدر. ايشته استاديمز بديع الزمانڭ رسالۀِ نور ايله خبر ويرديگى يوزلر حادثات ايچنده فلاكتلر، زلزله أليله طوغريلغنى إمضا ايدهرك گلن درت فلاكت، رسالۀِ نورڭ بر وسيلۀِ دفعِ بلا اولديغنى گوستردى. جنابِ حق، بزه و رسالۀِ نوره تعرّض ايدنلرڭ قلبلرينه ايمان و باشلرينه حقيقتى گورهجك عقل و گوز إحسان ايتسين؛ بزى بو زندانلردن، اونلرى ده بو فلاكتلردن قورتارسين، آمين!
خسرو
* * *
﴿بِاسْمِهٖ سُبْحَانَهُ﴾
عزيز، صدّيق قارداشلرم!
بر جلوۀِ عنايتِ ربّانيهدر كه؛ داها مدافعاتمزى و أوراقلريمزى و كتابلرى گورمهدن، يالڭز پرده آلتنده حسّ ايدوب معارف وكيلنڭ دهشتلى پوسكورمهسى و هجومى، بشنجى شعاع و هجماتِ ستّهنڭ ذيلى گبى غايت شدّتلى محرم رسالهلرى أڭ أهمّيتلى مقامات، بِالفعل تنقيد ايچون تدقيق ايتمهسى و مدافعاتمڭ جدّى، طوقوناقلى كفرِ مطلقه جرئتكارانه ضربهلرى آنقرهنڭ بزه قارشى چوق شدّتلى طاورانماسنى بكلركن، مسئلهنڭ عظمتنه نسبةً غايت ملايمانه بلكه مصالحهكارانه وضعيت آلمش. و بو جلوۀِ عنايتڭ بر حكمتى ده شودر: رسالۀِ نورڭ عموم مملكته علاقهسى جهتيله، عمومى بر درسخانهده و بيوك مقاماتده دقّت و مراقله اوقونماسيدر. أوت، بو زمانده بويله يوكسك بر درس، ألبته بويله جمعيتلى و كلّى و عمومى دائرهلرده اوقونماسى، بيوك بر عنايتدر و كفرِ مطلقى قيرديغنه بر قوّتلى أمارهدر.