مصيبت رسالۀِ نور طلبهلرينه گلهجك و آيت الكبرا حقّى ايچون او (فَجَتْ) و مصيبتدن شاكردلرينه أمان وير، دييه نياز ايدر، او رسالهيى و منبعنى شفاعتجى ياپار. أوت آيت الكبرا رسالهسنڭ طبعى بهانهسيله گلن مصيبت، عينًا او رمزِ غيبىيى تصديق ايتدى.
هم او قصيدهده رسالۀِ نورڭ مهمّ أجزالرينه ترتيبيله إشارتلرڭ خاتمهسنده، مقابل صحيفهده دير:
﴿وَتِلْكَ حُرُوفُ النُّورِ فَاجْمَعْ خَوَاصَّهَا ۞ وَحَقِّقْ مَعَانٖيهَا بِهَا الْخَيْرُ تُمِّمَتْ﴾
يعنى: «ايشته رسالۀِ نورڭ سوزلرى حرفلرى كه، اونلره إشارتلر أيلهدك. سن اونلرڭ خاصّهلرينى طوپلا و معنالرينى تحقيق أيله. بتون خير و سعادت، اونلرله تمام اولور.» دير. «حرفلرڭ معنالرينى تحقيق ايت.» قرينهسيله معنايى إفاده ايتمهين هجائى حرفلر مراد اولمايوب، بلكه كلمهلر معناسندهكى «سوزلر» ناميله رسالهلر مراددر.
﴿رَبَّنَا لَا تُؤَاخِذْنَٓا اِنْ نَسٖينَٓا اَوْ اَخْطَاْنَا﴾
﴿لَا يَعْلَمُ الْغَيْبَ اِلَّا اللّٰهُ﴾
سعيد النورسى
* * *
عزيز، صدّيق قارداشم رأفت بك!
سنڭ عالمانه سؤاللرڭ رسالۀِ نورڭ «مكتوبات» قسمنده چوق أهمّيتلى حقيقتلرڭ آناختارلرى اولماسندن سنڭ سؤاللرينه قارشى لاقيد قالامييورم. بونڭ قيصه جوابى شودر: