بولونمقدهيز. بو إنصافلى محكمهنڭ مسلّم إنصافلرينه ألبته ياقيشديرمايز. حتّى تمثيلده خطا اولماسين بر بكتاشىيه: «نه ايچون نماز قيلمييورسڭ؟» ديمشلر. او ده: «قرآنده (لَا تَقْرَبُوا الصَّلٰوةَ) وار» ديمش. اوڭا ديمشلر: «بونڭ آرقهسنى، يعنى (وَاَنْتُمْ سُكَارٰى) يى ده اوقو» دينيلديگنده، «بن حافظ دگلم» ديمش اولماسى قبيلندن، رسالۀِ نورڭ بر جملهسنى طوتوب او جملهيى تعديل و نتيجهيى بيان ايدن آخرينى آلميهرق عليهمزده ويريلمكدهدر. تقديم ايدهجگم مدافعهنامهمده، او إدّعانامهيه قارشى مقايسه ايديلديگنده بونڭ اوتوز قرق مثالى گورولهجكدر. بو نمونهلردن لطيف بر واقعهيى بيان ايدييورم:
أسكيشهر محكمهسنده مقامِ إدّعانڭ ناصلسه بر سهو نتيجهسى، رسالۀِ نورڭ ايمان درسلرينه «خلقلرى إفساد ايدييور» گبى بر تعبير و صوڭرهدن او تعبيردن واز گچديگى حالده، رسالۀِ نور شاكردلرندن عبد الرزّاق نامنده بر ذات محكمهدن بر سنه صوڭره ديمش:
«هَىْ بدبخت! اوتوز اوچ آياتِ قرآنيه إشاراتنڭ تقديرينه مظهر و إمامِ علىنڭ (رض) اوچ كرامتنڭ إخبارِ غيبيسيله و غوثِ أعظمڭ (قس) قوّتلى بر طرزده إخباريله قيمتِ دينيهسى تحقّق ايدن و بو يگرمى سنه ظرفنده إدارهيه هيچ بر ضررى طوقونميان و هيچ كيمسهيه هيچ بر ضرر ويرمهمسى ايله برابر بيڭلر وطن أولادينى تنوير و إرشاد ايدن و ايمانلرينى قوّتلنديرن و أخلاقلرينى دوزهلتن رسالۀِ نورڭ إرشادلرينه «إفساد» دييورسڭ. اللّٰهدن قورقمييورسڭ، ديلڭ قوروسون!» ديمش.
شيمدى بو شاكردڭ حقلى اولارق بو سوزينى مقامِ إدّعا گورديگى حالده، «سعيد، أطرافنه فساد صاچمش» تعبيرينى إنصافڭزه و وجدانڭزه حواله ايدييورم.
مقامِ إدّعا، رسالۀِ نورڭ إجتماعى درسلرينه ايليشمك فكريله، «دينڭ تختى و مقامى وجداندر، حكمه قانونه باغلانماز. أسكيدن باغلانماسيله إجتماعى