گلهجك بر مدرسۀِ كبرايى وجوده گتيرمگه ياقين موفّق اولماسى گوسترييور كه؛ وطنپرورلر و ملّيتپرورلر دخى، مدرسه علمالريله برابر بو استاديمى تقدير و تحسين ايتمهلرى لازم و ألزمدر. بز ده بويله بر استاد ألمزه گچديگى ايچون هر زحمت و مشقّته تحمّله قرار ويرمشز. فيوضاتِ علميهسيله و يوز اوتوزه واران آثارِ قدسيهسنڭ حقائقيله بنى علم و ايمان يولنده ترقّى ايتديرن بو ممتاز علاّمۀِ زمانه صوڭسز بر وارلقله حرمتم واردر. بو حرمتم أبده قدر إن شاء اللّٰه گيدهجكدر.
إدّعا مقامنڭ بنى صوچلانديرمق ايستديگى و آيلردن بَرى تدقيقات و تحرّيات نتيجهسنده حقيقتنه واصل اولامديغى «دينى و دينى حسّياتى آلَت ايدهرك دولتڭ أمنيتنى إخلال ايدهجك بر گيزلى جمعيت»ڭ نه وجودى وار و نه ده بويله بر جمعيتله علاقهمز واردر. يگانه علاقهمز، حكومتِ جمهوريهنڭ قانونلرى مواجههسنده أڭ چتين إمتحانلرده، أڭ يوكسك أهلِ وقوف هيئتلر طرفندن ايجاب ايدن حرمتى گورمش و صلاحيتدار محكمهلرده برائت قزانمش رسالۀِ نورلردر. بو ايسه، وطنه و ملّته إهانت دگل؛ طوغريدن طوغرىيه وطنه و ملّته نافع علم اوغرنده بر چاليشمقدر. بونڭ خارجنده نه بر سياسى مقصد و نه ده باشقه بر غرض يوقدر. بناءً عليه بو خصوصده ده معصوميت و صميميتمز ميدانده اولمقله، دڭزلى محكمهسنده اولديغى گبى يوكسك محكمۀِ عادلهڭزدن عدالتڭ تجلّيسيله برائتمى طلب ايدييورم.
آفيون جزا أونده موقوف قسطمونيلى
محمد فيضى پاموقجى
* * *