ايمانى و عشقِ إسلامى قزانديران رسالۀِ نور، هيچ شبهه يوقدر كه اونڭ بتون سوزلرى و لمعه و شعاعلرى قرآنِ معجز البيانڭ برر نورانى تفسيريدرلر. معنوى خستهلقلرى و معنوى قراڭلقلرى إزاله ايدن غايت پارلاق برر گونشدرلر. رسالۀِ نورڭ مؤلّفلگيله توظيف ايديلن استاديمزڭ ايمان و قرآن يولنده گچن و هر درلو زورلق و صيقنتيلره گوگس گرهرك قرآن حقيقتلرينى نشر ايله بو عصردهكى، خصوصًا بو مبارك ملّتڭ أولادلرينى قومونيستلك و هر درلو دينسزلگڭ دهشتلى هجومندن قورتارمغه چاليشان، تميز و پُرُزْسز حياتنڭ شهادتيله، او بو زمانده بو قدسى وظيفه ايله توظيف ايديلمش. او بزه (حاشا!) بوزغونجيلق و أخلاقسزلق درسنى ويرمييور. بلكه او بزه، نوعِ بشر دنياسنڭ أڭ بيوك دعواسى و أڭ مهمّ مسئلهسى اولان ايمانى قورتارمق درسنى ويرييور. يگرمى بش اوتوز سنهدن بَرى يوز بيڭلرله أهلِ ايمانڭ رسالۀِ نورله ايمانلرينڭ قورتولمسنه چاليشماسى؛ بِالخاصّه بنم گبى إسلاميتدن خبرى اولميان بيچارهلره أڭ بيوك سعادت و حياتڭ غايهسى اولان ايمانى درس ويرمسيله ألبته و ألبته او بزه بر لطفِ إلٰهيدر. اونڭ قدسى خدمتِ ايمانيه و وظيفۀِ دينيهسنى إنكارله، بتون حق و حقيقتڭ عكسنه اونى حياتِ إجتماعيهيه ضررلى گورنلره ديرز:
أگر ايمان ايله اللّٰهه باغلانمق و دينڭ أوامرينه إطاعت ايدهرك أخلاقسزلق و ايمانسزلق گبى قورقونج آفتلردن إنسانلرى قورتارمق و إسلاميتڭ دائمى سعادتيله اونى مسعود ايتمك بر جُرم ايسه؛ او وقت حياتِ إجتماعيه ايچون ضررليدر دينيلهبيلير. يوقسه أڭ بيوك بر إفترادر و قطعيًا عفو ايديلمز بر جُرمدر. رسالۀِ نورڭ هدفى دنيا دگل، دائمى آخرت سعادتى و بتون حياتِ دنيويهدهكى حسن و جمال اونڭ جلوۀِ جمالنڭ بر نوع گولگهسى و بتون جنّت بتون لطائفيله بر لمعۀِ محبّتى اولان بر دائمِ باقينڭ بر رحيمِ ذو الجمالڭ رضاسيدر. بويله إلٰهى و قدسى و چوق