درلو خلق طبقهسى اوقويوب آڭلايهبيلييور. كندى إستعدادلرى نسبتنده گوردكلرى إستفادهلر قارشيسنده اوڭا بر قات داها صاريلييورلر. ليسهليلر، اونورسيتهليلر، پروفسورلر، دوچنتلر، فيلسوفلر اوقويورلر. بو منوّر صنفلر فوق العاده إستفاده ايتدكلرى گبى؛ رسالۀِ نورڭ خارق العادهلگنى و تأليف صنعتندهكى اوستونلگنى تصديق ايدوب حيرتلر ايچريسنده بتون كلّياتى اوقومق إشتياقنه صاحب اولويورلر.
بديع الزمانى و رسالۀِ نورى هر يڭى طانييان مُدْرِك و تقديركار كيمسهلر، داها أوّل طانيمدقلرينه بيڭلر تأسّف ايدوب، غيب ايتدكلرى زمانلرى تلافى ايدهبيلمك ايچون مساعد وقتلرينى بوشه صرف ايتميهرك، بش دقيقهلق بر زمانه دخى أهمّيت ويروب، گيجهلى گوندوزلى رسالۀِ نوره چاليشمغه باشلايورلر. بو رغبت و شدّتلى علاقه هيچ بر پسيقولوغ، سوسيولوغ و فيلسوفڭ أثرنده گورولمهمشدر. اونلردن آنجق تحصيللى كيمسهلر إستفاده ايدهبيلمشلردر. بر اورته اوقول چوجغى ويا اوقوماسنى بيلن بر قادين، بيوك بر فيلسوفڭ أثرينى اوقوديغى زمان إستفاده ايدهمهمشدر. فقط رسالۀِ نوردن هركس درجهسنه گوره إستفاده ايتمكدهدر. بونڭ ايچون، سزلرڭ بديع الزمان و رسالۀِ نور شاكردلرينه ويرهجگڭز برائت قرارينى بتون بر ملّت بكلهشييور. أگر سعيد النورسى، طلبهلرينه مصيبت زماننده صبر و تحمّل و إعتدال تلقين ايتمهمش اولسه ايدى؛ گوڭللى آلاى قوماندانى اولارق حربه إشتراك ايتديگى زمان طوپلاديغى طلبهلرى گبى حرمتكار اولان بيڭلر رسالۀِ نور شاكردلرى، آفيون تپهلرينه قوراجقلرى چاديرلر ايچريسنده، آفيون آغير جزا محكمهسنڭ برائت قرارينى بكلهيهجكلردى.
سعيد النورسى و رسالۀِ نور شاكردلرينڭ چاليشمالرينى، قانون چرچيوهسنه آلينوب گيزلى جمعيت اولديغى إثبات ايديلهمييور. نهدن إثبات ايديلهمييور؟ عجبا وقوفلى بر عدليهجى اولمقله باش مدّعىعموميلگه قدر يوكسهلن بر شخص، بو