گلمش. فقط هر برى اوچ وظيفهدن بريسنى بر جهتده ياپماسى إعتباريله، آخر زمانڭ بيوك مهديسى عنواننى آلمامشلر.
ايكنجيسى:
آخر زمانڭ او بيوك شخصى، آلِ بيتدن اولاجق. گرچه معنًا بن حضرتِ علىنڭ (رض) بر ولدِ معنويسى حكمندهيم. اوندن حقيقت درسنى آلدم. و آلِ محمّد (عصم) بر معناده حقيقى نور شاكردلرينه شامل اولماسندن بن ده آلِ بيتدن صاييلهبيليرم. فقط نورڭ مسلگنده هيچ بر جهتده بنلك، شخصيت، شخصى مقاملرى آرزو ايتمك، شان و شرف قزانمق اولماز. نورده إخلاصى بوزمامق ايچون اُخروى مقامات دخى بڭا ويريلسه، بيراقمغه كنديمى مجبور بيليرم دييه يارى موافقت شكلنده بر جواب ويريلمكده (حاشيه) و بو مهديلك تكليفى آچيق و كسين اولارق ردّ ايديلمهمكدهدر.
* * *
(بو فقرهدهكى حادثهلر واقعه مطابق و عجيب بر طرزده «بنى محزون ايتمهيڭز، زمين حدّت ايدر.» ديديگمدن اوچ دقيقه صوڭره زلزله اولماسنى، حيرت و تعجّبله تحسين ايتمك شفقتڭ إقتضاسى اولديغى حالده، مدارِ تنقيد اولاماز.)
«درت ساعت إفادهسى آلينوب صيقنتى چكمهسندن اون ساعت صوڭره، عادتا عين زمانده ايكى ميليون ليرا ضرر ويرن معارف يانغينى گوستردى كه؛ رسالۀِ نور بلالرڭ دفعنه بر وسيلهدر كه، نورلره هجوم ايديلدى، بلا يول بولدى، گلدى.» دينيلمكدهدر.
___
(حاشيه): أى إنصافسز هيئت! بوندن داها كسكين ردّ جوابى ناصلدر؟
نور طلبهلرى نامنه
خسرو