أهلِ ايمان مأمورلره، او منافق و زنديق تعبيرينى ويرمك بيوك بر جنايتدر. و بو ديندار ملّتى بر تحقير و إتهامدر كه، سعيد مكرّر ديمش: او وظيفهپرور مسلمانلر نورلره ضرر ويرمهين و إستفاده ايدن عدليه مأمورلرى بنى إعدامله محكوم ايتسهلر، حقّمى اونلره حلال ايدرم دييوب، ممكن اولديغى قدر مصالحهكارانه اونلرڭ وظيفهلرينه طوقونهجق حركاتدن چكينن بر منزوى و غريب آدم حقّنده بو إتهام بيوك بر گناه و بر إفترادر. حالبوكه سعيدى بيلنلر بيليرلر كه، ممكن اولديغى قدر تكفيردن چكينير. حتّى صريح كفرى بر آدمدن گورسه ده، ينه تأويله چاليشير. اونى تكفير ايتمز. هر وقت حسنِ ظن ايله حركت ايتديگى حالده اوڭا بو إتهامى ياپان ألبته كنديسى او إتهام ايله تام متّهمدر.
هم گيزلى دشمنى و إفساد قوميتهسى يوق ديمسى اويله بر يالاندر كه، قومونيست و ماصون و طاشناق گبى چوق قوميتهلر لسانِ حال ايله؛ بو إفترادر، بز ميداندهيز ديرلر. و اوتوز سنهدن بَرى أمثالسز بر طرزده سعيدڭ باشنه گلن أليم حادثهلر، خصوصًا بو اون آى تجريدِ مطلق و سعيدڭ هر شيئى بيراقوب بتون قوّتيله قرآن ايچون او متجاوز دين دشمنلرينه قارشى يوز نور رسالهلريله غالبانه چاليشماسى، او يالان دعوايى يوز حجّتله تكذيب ايدر.
هم إدّعاجينڭ «اونى زهرلهين اولمامش.» ديمسى، اويله بر خطادر كه، او دائما سعيد ايله بولونمق و سرگذشتۀِ حياتنه تمامًا مطّلع اولمقله آنجق او منفى حكمنى إثبات و يگرمى سنه قولتوغم آلتنده ايشلهين و گورنلر حيرت ايدن و آشيلامقله اولان زهر چيبانى و يانمده بولونان دوستلرڭ گورهرك شهادتلريله هم قسطمونيده، هم دڭزلى حپسنده، هم أميرطاغندهكى تسمّملريمى إنكار ايتمكله او خطاسنى تعمير ايدهبيلير.