معجزۀِ معنويهسى و شمالدن گلن تهلكهلره قارشى بو ملّت و بو وطنڭ بر قوّتلى سدّى اولديغنى تصديق ايتدكلرندن، محكمهڭز بونڭ طلبهلرينى بوندن اوركوتمك دگل، بلكه حقوقِ عامّه نقطهسنده ترغيب ايتمك بر وظيفهڭز بيلييورز و اونى سزدن بكلهيورز. ملّته، وطنه، آسايشه مضر دينسزلرڭ و بعض سياسى زنديقلرڭ كتابلرينه و مجموعهلرينه حرّيتِ علميه سربستيتيله ايليشيلمديگى حالده؛ معصوم و محتاج بر گنجڭ ايماننى قورتارمق و سوءِ أخلاقدن قورتولمق ايچون نوره طلبه اولماسى ألبته دگل بر صوچ، بلكه حكومت و معارف دائرهسى تشويق و تقدير ايدهجك بر حالتدر.
صوڭ سوزم: جنابِ حق، حاكملرى عدالتِ حقيقيهيه موفّق ايتسين. آمين دييوب،
﴿حَسْبُنَا اللّٰهُ وَنِعْمَ الْوَكٖيلُ نِعْمَ الْمَوْلٰى وَ نِعْمَ النَّصٖيرُ اَلْحَمْدُ لِلّٰهِ رَبِّ الْعَالَمٖينَ﴾ در.
سعيد النورسى
* * *
صوڭ سوزم
هيئتِ حاكمهيه بيان ايدييورم كه:
هم إدّعانامهدن، هم اوزون تجريدلرمدن آڭلادم كه، بو مسئلهده أڭ زياده شخصم نظره آلينييور و شخصمى چوروتمك مصلحت گورولمش. گويا شخصيتمڭ إدارهيه، آسايشه، وطنه ضررى وار. و بن ده دين پردهسى آلتنده دنيوى مقصدلر گودويورمشم، بر نوع سياست پشنده قوشويورمشم. بوڭا قارشى، سزه بونى قطعيتله بيان ايدييورم: