طرزِ قيافتى دگيشديريلمگه مجبور ايديلمهين و شاپقه يارى عسكرڭ باشندن قالقماسيله برابر، منزوى بر آدمڭ زورله باشنه شاپقه گيديرمگه جبر ايتمگى هانگى مصلحت، هانگى قانون بوڭا مساعده ايدر؟
طوقوزنجيسى:
چوق مهمدر، (حاشيه) قوّتليدر.. فقط سياسته تماس ايتديگى ايچون سكوت ايدييورم.
اوننجيسى:
بو ده، هيچ بر قانون مساعده ايتمديگى و هيچ بر مصلحت بولونمديغى و يالڭز معناسز أوهامدن بر حبّهيى قبّهلر ياپمقدن و هيچ بر قانونه گيرمهين بر تعرّضدر. بو ده، مسلگمزجه باقهمديغمز سياسته تماس ايتمهمك ايچون سكوت ايدييورز. بويلهجه اون وجهله قانونسز معاملهلره قارشى يالڭز (حَسْبُنَا اللّٰهُ وَنِعْمَ الْوَكٖيلُ) ديرز.
سعيد النورسى
* * *
___
(حاشيه): إسلام حكومتلرنده خرستيان و يهودى بولونماسى و خرستيان و مجوسى حكومتلرنده مسلمانلر بولونديغى گوسترييور كه، إداره و آسايشه بِالفعل ايليشمهين مخالفلره قانونجه ايليشيلمز. هم إمكانات، مدارِ مسئوليت اولاماز. يوقسه هركس بر آدمى ئولديرهبيلير دييه، هركسى بو إمكانات ايله محكمهيه ويرمك لازم گلير.