زمانِ سعادتدن شيمدىيه قدر جارى بر عادتِ إسلاميهيه إتّباعًا رسالۀِ نورڭ خصوصى منبعلرى اولان يوزر آياتِ مشهورهيى بيوك بر أنعام گبى حزبِ قرآنى ياپديغمزى، «دينده تحريفات ياپييور» دييه مؤاخذه ايتمشلر.
هم بر سنه جزاسنى چكديگم و محرم طوتولان و ضبطنامهده قيد ايديلديگى گبى اودون ييغينلرى آلتندن چيقاريلان تستّر رسالهسى بو سنه يازيلمش و نشر ايديلمش گبى، بزى إتهام ايتمك ايستهيور. هم آنقرهده حكومتڭ رياستنده بولونان معلوم بريسنه ايتديگم إعتراضلره و آغير سوزلره قارشى او رئيس مقابله ايتمهيوب سكوت ايتمهسى و او ئولدكدن صوڭره، اونڭ ياڭليشنى گوسترن بر حقيقتِ حديثيهيى قرق سنه أوّل بياندهكى فطرى و لزوملى و كلّى و محرم تنقيدلرم، مقامِ إدّعا جربزهسيله اوڭا تام تطبيق ايله بزه مدارِ مسئوليت ياپيلمش. ئولمش و حكومتدن علاقهسى كسيلمش بر شخصڭ خاطرى نرهده؟ حكومتڭ و ملّتڭ بر خاطرهسى و جنابِ حقّڭ بر تجلّئِ حاكميتى اولان عدالت قانونلرى نرهده؟
هم بز حكومتِ جمهوريه أساسلرندن أڭ زياده كنديمزه مدارِ إستناد و اونڭ ايله كنديمزى مدافعه ايتديگمز حرّيتِ وجدان أساسى، بزم عليهمزده مدارِ مسئوليت طوتولمش؛ گويا بز حرّيتِ وجدان أساسنه معارض گيدييورز.
هم بر رسالهده، مدنيتڭ سيّئاتنى و قصورلرينى تنقيد ايتديگمدن خاطر و خيالمه گلمهين بر شيئى ضبطنامهلرده إسناد ايدييور: گويا بن راديو (حاشيه) و طيّاره و شمندوفرڭ قوللانيلماسنى قبول ايتمييورم دييه، ترقّياتِ حاضره عليهنده بولونديغمله مسئول ايدييور.
___
(حاشيه): راديو گبى عظيم بر نعمتِ إلٰهيهيه قارشى عظيم بر شكر اولمق ايچون: «راديو قرآنى اوقويوب بتون زمين يوزندهكى إنسانلره ديڭلتديروب، كُرۀِ هوانڭ بر حافظِ قرآن اولماسيدر.» ديمشدم.