درت يوز صحيفهلى ذو الفقارڭ يالڭز ايكى صحيفهسنده (شيمديكى قانونه اويغون اولمامسندن) اوتوز سنه أوّل يازيلان ايكى آيتڭ تفسيرندن باشقه ايليشمهمسى و دڭزلى و آنقره أهلِ وقوفى اون بش سهودن باشقه ايليشمهمسيله و شيمدىيه قدر يوز بيڭلر آدمڭ إصلاحنه وسيله اولماسيله، وطنه و ملّته بيڭ بيوك منفعتى تحقّق ايدن رسالۀِ نوره، كوچك بر خدمت ايدن ويا كندى ايماننى قورتارديغى ايچون بر رسالهسنى يازان و أميرطاغنده غريب و إختيارلغمه شفقةً بڭا قارداشلق ايدن چاليشقانلر گبى رضاىِ إلٰهى ايچون بڭا خدمت ايدن بيچارهلرى ايش موسمنده و دهشتلى قيشده تحتِ توقيفه آلمق، حكومتِ جمهوريهنڭ هانگى پرنسبيله قابلِ توفيق اولابيلير؟ و هانگى قانونى، مساعده ايتمگه إمكانى وار؟
مادام جمهوريت پرنسيبلرى حرّيتِ وجدان قانونى ايله دينسزلره ايليشمييور، ألبته ممكن اولديغى قدر دنيايه قاريشميان و أهلِ دنيا ايله مبارزه ايتمهين و آخرتنه و ايماننه و وطننه دخى نافع بر طرزده چاليشان ديندارلره ده ايليشمهمك گركدر و ألزمدر. بيڭ سنهدن بَرى بو ملّتڭ غدا و علاج گبى بر حاجتِ ضروريهسى اولان تقوايى و صلاحتى بو مظهرِ أنبيا اولان آسياده حكم ايدن أهلِ سياست ياساق ايتمز و ايدهمز بيلييورز. يگرمى سنهدن بَرى منزوى ياشايان و يگرمى سنه أوّلكى سعيدڭ قفاسيله صورديغى بو سؤاللرده بو زمانڭ طرزِ تلقّيسنه اويغون گلمهين قصورلرينه باقمهمق إنسانيتڭ مقتضاسيدر.
وطن و ملّت و آسايشڭ منفعتى حسابنه بونى ده خاطرلتمق بر وظيفۀِ وطنيهم اولماسى جهتيله ديرم: بويله بزه و رسالۀِ نوره آز بر مناسبتله تحتِ توقيفه آلينمق، گوجنديرمك يوزندن وطنه و آسايشه ديندارانه منفعتى بولونان پك چوق ذاتلرى إداره عليهنه چويرهبيلير، آنارشيلگه ميدان ويرر. أوت رسالۀِ نور ايله ايمانلرينى قورتاران و ملّته ضررسز و تام منفعتدار وضعيته گيرنلر يوز بيڭدن چوق زيادهدر.