ايدن و حياتِ دنيويهيى دخى ألم ايچنده ألمه، عذاب ايچنده عذابه چويرن كفرِ مطلقه قارشى غالبانه رسالۀِ نور ايله مقابله ايتديگنه اونڭ ايله ايمانلرينى قورتاران يوز بيڭ شاهدڭ شهادتيله إثبات ايدن و قرآندن ترشّح ايدن رسالۀِ نور ايله ئولومى يوز بيڭ آدم حقّنده إعدامِ أبديدن ترخيص تذكرهسنه چويرن بر آدمه بو درجه ايليشمك و مأيوس ايتمك و اونى آغلاتمقله، او معصوم يوز بيڭلر قارداشلرينى آغلاتمايه هانگى قانون وار؟ هانگى مصلحت وار؟ عدالت نامنه أمثالسز بر غدر اولماز مى؟ و قانون حسابنه، أمثالسز بر قانونسزلق دگل مى؟
أگر بو تحرّيلرده بعض وظيفهدار مأمورلرڭ إعتراض ايتدكلرى گبى ديرسهڭز كه: سن و بر ايكى رسالهڭ رژيمه و اصولمزه مخالف گيدييورسڭز؟
الجواب:
أوّلًا: بو يڭى اصولڭزڭ منزويلرڭ چلّهخانهلرينه گيرمگه هيچ بر حقّى يوقدر.
ثانيًا: بر شيئى ردّ ايتمك آيريدر، قلبًا قبول ايتمهمك آيريدر و عمل ايتمهمك بتون بتون آيريدر. أهلِ حكومت أله باقار، قلبه باقماز. إداره و آسايشه ايليشمهين شدّتلى مخالفلر، هر حكومتده بولونور. حتّى حضرتِ عُمَرڭ (رض) تحتِ حاكميتندهكى خرستيانلره، قانونِ شريعتى و قرآنى إنكار ايتدكلرى حالده ايليشيلمييوردى. حرّيتِ فكر و سربستيتِ وجدان دستورى ايله رسالۀِ نورڭ بر قسم شاكردلرى؛ إدارهيه طوقونمامق شرطيله رژيم و اصولڭزى علمًا قبول ايتمزسه و مخالف عمل ايتسه حتّى رژيمڭ صاحبنه عداوت ايتسه، اونلره قانونًا ايليشيلمز. رسالهلر ايسه، او گبى رسالهلره محرم ديمشز، نشرينى منع ايتميشز. حتّى بو دفعه بو حادثهيه سببيت ويرن رساله قسطمونيده سكز سنه ظرفنده بر ويا ايكى دفعه بر تك نسخه بريسى بڭا گتيردى. عين گونده غيب ايتديردك. شيمدى سز اونى زور ايله تشهير ايدييورسڭز و إشتهار ده ايتدى.