جلوهلريله بر مجيبِ مغيث، بر رحيمِ كريمى بيلديروب او ذىروح عالمنڭ بتون صلوات و عبوديتلرينى اوڭا تقديم و تخصيص ايدر معناسيله، معراجِ أكبرده محمّد (عليه الصلاة والسلام) و معراجِ أصغر اولان نمازلرده اونڭ اُمّتى (اَلصَّلَوَاتُ اَلطَّيِّبَاتُ لِلّٰهِ) دير.
دردنجى كلمۀِ قدسيه:
(اَلطَّيِّبَاتُ لِلّٰهِ) در. رسالۀِ نورڭ چوق حقيقتلرى نماز تسبيحاتنده إخطار ايديلمسى حكمتيله؛ هم فاتحهنڭ، هم تشهّدڭ كلمهلرينڭ حقيقتلرينى قيصه إشارتلرله بيان ايتمگه عادتا إختيارسز سَوق ايديلدم.
ايشته معراجِ محمّديده (عصم) دينيلن (اَلطَّيِّبَاتُ) كلمۀِ قدسيهسى؛ أهلِ معرفت و ايمان و كلّى شعور صاحبى اولان إنس و جنّ و مَلك و روحانيلرڭ، كائناتى گوزل طيّبهلرى و حسنهلرى و عبوديتلريله گوزللشديرن و گوزللرڭ عالمنه باقان و سرمدى جميلِ مطلقڭ حدسز جمال و گوزللكلرينى و كائناتى سوسلنديرن إسملرينڭ دائمى گوزللكلرينى تام بيلن و عشق و شوقله كلّى عبوديتلر ايله مقابله ايدن و پارلاق ايمان و گنيش معرفتلر و مدح و ثنالرڭ روائحِ طيّبه و خوش قوقولريله خالقلرينه قارشى او حدسز طيّباتلر معناسيله معراجده سويلنمش سرّيله؛ تشهّدده بتون اُمّت، هر گون اوصانمهدن او قدسى كلمۀِ طيّبهيى تكرار ايدرلر.
أوت بو كائنات، نهايتسز بر حسن و جمالِ سرمدينڭ آيينهسى و جلوهلرى و كائناتدهكى بتون جمال و كمال و گوزللكلر، او سرمدى حُسندن گلير و اوڭا إنتسابله گوزللشير، قيمتى يوكسلير. يوقسه قارمهقاريشيق بر ويرانه، بر حزنگاه اولور. و او إنتساب ايسه، سلطنتِ الوهيتڭ دلاّللرى و إعلانجيلرى اولان إنس و مَلك و روحانيلرڭ معرفت و تصديقلريله آڭلاشيلير. حتّى او دلاّللرڭ گوزل و طاتلى حمدلرينى و ثنالرينى و معبودينه مدحلرينى و اونلرڭ كلمهلرينى هر طرفه نشر و عرشِ