الحجّة الزهرانڭ ايكنجى مقامى
﴿بِسْمِ اللّٰهِ الرَّحْمٰنِ الرَّحٖيمِ﴾
﴿وَبِهٖ نَسْتَعٖينُ﴾
فاتحهنڭ آخرنده، أهلِ هدايت و إستقامت و أهلِ ضلالت و طغيانڭ موازنهسنه إشارت ايدن و رسالۀِ نورڭ بتون موازنهلرينڭ منبعى اولان آيتڭ بر حقيقتنى سورۀِ نوردن
﴿اَللّٰهُ نُورُ السَّمٰوَاتِ وَالْاَرْضِ مَثَلُ نُورِهٖ كَمِشْكٰوةٍ فٖيهَا مِصْبَاحٌ اَلْمِصْبَاحُ فٖى زُجَاجَةٍ اَلزُّجَاجَةُ كَاَنَّهَا كَوْكَبٌ دُرِّىٌّ يُوقَدُ مِنْ شَجَرَةٍ مُبَارَكَةٍ ... الخ﴾
آيتى و آرقهسنده
﴿اَوْ كَظُلُمَاتٍ فٖى بَحْرٍ لُجِّىٍّ يَغْشٰيهُ مَوْجٌ مِنْ فَوْقِهٖ مَوْجٌ﴾
الخره... آيتيله برابر پك عجيب بر طرزده او موازنهيى معجزانه إفاده ايدرلر.
برنجى آيتِ نور (برنجى شعاعده إثبات ايديلمش كه) اون إشارتله رسالۀِ نوره باقييور، معجزانه قرآنڭ او تفسيرندن غيبى خبر ويرييور. و رسالۀِ نوره نور نامى ويريلمسنه أڭ برنجى سبب اولماسندن، يگرمى طوقوزنجى مكتوبڭ بر قسمنده بر سياحتِ خياليه تمثيلنده، بو عجيب آيتڭ «نور» كلمهسنده «نُونِ نَعْبُدُ»