قپولرينى آچمشدر. بو ايكنجى علامتِ توحيد سراج النورڭ بلكه يوز يرلرنده بيان ايديلديگندن، بوراده خفيف بر إشارتله إكتفا ايتدك.

اوچنجى حجّت و علامت:

﴿لَهُ الْمُلْكُ وَلَهُ الْحَمْدُ﴾

ايله إشارت ايديلن حدّ و حسابه گلمه‌ين توحيد سكّه‌لريدر. أوت هر شيئڭ يوزنده، جزئى اولسون كلّى اولسون، ذرّاتدن تا سيّاراته قدر اويله بر سكّه وار كه، آيينه‌ده گونشڭ جلوه‌سى گونشى گوسترديگى گبى، اويله ده او سكّه آيينه‌سى دخى، شمسِ أزل و أبده إشارت ايده‌رك، وحدتنه شهادت ايدر. او حدسز سكّه‌لردن پك چوقلرى سراج النورده تفصيلًا بيان ايديلديگندن بوراده يالڭز قيصه بر إشارتله اوچ دانه‌سنه باقه‌جغز. شويله كه:

مجموعِ كائناتڭ يوزينه، أنواعڭ بربرينه قارشى گوستردكلرى تعاون، تساند، تشابه، تداخلدن مركّب گنيش بر سكّۀِ وحدت قونولديغى گبى، زمينڭ يوزينه ده، درت يوز بيڭ حيوانى و نباتى طائفه‌لردن مركّب بر اوردوىِ سبحانينڭ آيرى آيرى أرزاق، أسلحه، ألبسه، تعليمات، ترخيصات جهتنده غايت إنتظام ايله هيچ برينى شاشيرميه‌رق، وقتى وقتنه ويريلمه‌سيله قويديغى او سكّۀِ توحيد مِثللو إنسانڭ يوزينه ده، هر بر يوزڭ عموم يوزلره قارشى برر علامتِ فارقه بولونماسيله قويديغى سكّۀِ وحدانيت گبى هر بر مصنوعڭ يوزنده (جزئى اولسون كلّى اولسون) برر سكّۀِ توحيد و هر بر مخلوقڭ باشنده (بيوك اولسون، كوچك اولسون، آز و چوق اولسون) برر خاتمِ أحديت مشاهده ايديلير. و بِالخاصّه ذى‌حيات مخلوقلرڭ سكّه‌لرى چوق پارلاقدرلر. بلكه هر بر ذى‌حيات كنديسى دخى برر سكّۀِ توحيد، برر خاتمِ وحدت، برر مُهرِ أحديت، برر طرّۀِ صمديتدرلر.

أوت هر بر چيچك، هر بر ميوه، هر بر ياپراق، هر بر نبات، هر بر حيوان؛ اويله برر مُهرِ أحديت، برر خاتمِ صمديتدر كه، هر بر آغاجى برر مكتوبِ ربّانى و هر بر