(فٖى زُجَاجَةٍ) وقف يرى اولديغندن (ة)، (هـ) اولمق جهتيله بيڭ اوچ يوز قرق طوقوز (١٣٤٩) ايدهرك، رسائل النورڭ أڭ نورانى جزءلرينڭ تأليفى هنگامى و تكمّل زمانى اولان بيڭ اوچ يوز قرق طوقوز تاريخنه تام تامنه توافقله إشارت ايدر.
هم (اَلْمِصْبَاحُ فٖى زُجَاجَةٍ اَلزُّجَاجَةُ كَاَنَّهَا كَوْكَبٌ دُرِّىٌّ) جملهسى بيڭ اوچيوز قرق بش (١٣٤٥) ايدهرك، رسائل النورڭ إنتشارى و إشتهارى و پارلاماسى تاريخنه تام تامنه توافق ايدر. چونكه شدّهلى (ر) ايكى (ر)، شدّهلى (ن) ايكى (ن)، شدّهلى (ز) أصلى إعتباريله بر (ل) بر (ز) و برنجى (زُجَاجَة) وقف جهتيله (هـ)، ايكنجى وقف اولماديغندن (ت) صاييلير. أگر شدّهلى (ز) ايكى (ز) صاييلسه او وقت بيڭ اوچ يوز يگرمى ايكى (١٣٢٢) ايدر كه، ينه رسالۀِ النور مؤلّفى، مقدّماتِ نوريهيه باشلاديغى عين تاريخه تام تامنه توافق ايدر.
هم (مِنْ شَجَرَةٍ مُبَارَكَةٍ) جملهسى؛ تاءِ أوّل (ت)، ايكنجى (ت) ايسه وقف يرى اولديغندن (هـ) اولمق و (شَجَرَةٍ) دهكى تنوين (ن) صاييلمق جهتيله بيڭ اوچيوز اون بر (١٣١١) ايدر كه، او تاريخده رسائل النور مؤلّفى رسالة النورڭ مبارك شجرۀِ قدسيهسى اولان قرآنڭ باصامقلرى اولان علومِ عربيهيى تدريسه باشلاديغى عين تاريخه تام تامنه توافق ايدهرك رمزًا باقار. ايشته بو قدر معنيدار و متعدّد توافقاتِ قرآنيهنڭ إتّفاقى يالڭز بر أماره، بر إشارت دگل، بلكه قوّتلى بر دلالتدر. بلكه ألكتريق ايله برابر رسائل النوره مناسبتِ معنويهسيله بر تصريحدر.