ديمسى، إستقبالده معظّم اُمّتى و امّتنڭ صالحلرى، سلامِ إلٰهىيى تمثيل ايدن إسلاميته مظهر اولماسنى و إسلاميتڭ عمومى بر شعارى اولان مؤمنلر اورتهسندهكى (اَلسَّلَامُ عَلَيْكَ وَعَلَيْكَ السَّلَامُ) عموم اُمّت ديمهسنى راجيانه، داعيانه خالقندن ايستديگنى إفاده و إخطار ايدر. و او صحبتده حصّهدار اولان حضرتِ جبرائيل عليه السلام، أمرِ إلٰهى ايله او گيجه (اَشْهَدُ اَنْ لَا اِلٰهَ اِلَّا اللّٰهُ وَاَشْهَدُ اَنَّ مُحَمَّدًا رَسُولُ اللّٰهِ) ديمسى، بتون اُمّت قيامته قدر بويله شهادت ايدهجگنى و بويله دييهجكلرينى مبشّرانه خبر ويرر. و بو مكالمۀِ قدسيهيى تخطّر ايله كلمهلرڭ معنالرى پارلار، گنيشلنير.
بو مذكور حقيقتڭ إنكشافنده بڭا يارديم ايدن غريب بر حالتِ روحيهدر:
بر زمان قراڭلقلى بر غربتده، قراڭلق بر گيجهده، ظلمتلى بر غفلت ايچنده، حالِ حاضرده اولان بو قوجه كائنات؛ خيالمه جامد، روحسز، ميّت، بوش، خالى، مدهش بر جنازه گوروندى. گچمش زمان دخى بتون بتون ئولو، بوش، ميّت، مدهش تخيّل ايديلدى. او حدسز مكان و او حدودسز زمان، قراڭلقلى بر وحشتگاه صورتنى آلدى. بن او حالتدن قورتولمق ايچون نمازه إلتجا ايتدم. تشهّدده (اَلتَّحِيَّاتُ) ديديگم زمان بردن كائنات جانلاندى؛ حياتدار، نورانى بر شكل آلدى، ديريلدى. حىّ قيّومڭ پارلاق بر آيينهسى اولدى. بتون حياتدار أجزاسيله برابر، حياتلرينڭ تحيّهلرينى و هداياىِ حياتيهلرينى دائمى بر صورتده ذاتِ حىّ قيّومه تقديم ايتدكلرينى علم اليقين، بلكه حقّ اليقين ايله بيلدم و گوردم.
صوڭره (اَلسَّلَامُ عَلَيْكَ يَا اَيُّهَا النَّبِىُّ) ديديگم وقت، او حدودسز و خالى زمان؛ بردن رسولِ أكرم عليه الصلاة والسلامڭ رياستى آلتنده، ذىحيات روحلر ايله وحشتزار صورتندن، انسيتلى بر سيرانگاه صورتنه إنقلاب ايتدى.