حكمتِ إلٰهيهيه سجدۀِ إطاعت ايدهرك، دساتيرِ حكمتِ سبحانيهيه أمربر شكلنى آلييورلر. ألبته او خشيتدن، او يوكسك موقعى ترك ايدوب متواضعانه آشاغى يرلرى إختيار ايتمك و او مهمّ منفعتلره سبب اولمق بيهوده اولمايوب، باشى بوش دگل و تصادفى دخى اولماديغنى، بلكه بر حكيمِ قديرڭ تصرّفاتِ حكيمانهسيله، او إنتظامسزلق ايچنده ظاهر نظره گورونمهين بر إنتظامِ حكيمانه بولونديغنه دليل ايسه؛ او طاشلره متعلّق فائدهلر، منفعتلر و اونلر اوستنده يووارلاندقلرى طاغڭ جسدينه گيديريلن و چيچك و ميوهلرڭ مرصّعاتيله منقّش و مزيَّن اولان گوملكلرڭ كمالِ إنتظامى و حسنِ صنعتى؛ قطعى، شبههسز شهادت ايدر.
ايشته شو اوچ آيتڭ، حكمت نقطۀِ نظرنده نه قدر قيمتدار اولديغنى گورديڭز. شيمدى باقڭز قرآنڭ لطافتِ بياننه و إعجازِ بلاغتنه؛ ناصل شو ذكر اولونان بيوك و گنيش و أهمّيتلى حقيقتلرڭ اوجلرينى اوچ فقره ايچنده اوچ واقعۀِ مشهوره و مشهوده ايله گوسترييور و مدارِ عبرت اوچ حادثۀِ اُخرٰىيى خاطرلاتمقله لطيف بر إرشاد ياپار، مقاومتسوز بر زجر ايدر.
مثلا: ايكنجى فقرهده دير:
﴿وَاِنَّ مِنْهَا لَمَا يَشَّقَّقُ فَيَخْرُجُ مِنْهُ الْمَٓاءُ﴾
شو فقره ايله حضرتِ موسى عليه السلامڭ عصاسنه قارشى كمالِ شوق ايله إنشقاق ايدوب اون ايكى گوزندن اون ايكى چشمه آقيتان طاشه إشارت ايتمكله، شويله بر معنايى إفهام ايدييور و معنًا دييور: أى بنى إسرائيل! بر تك معجزۀِ موسىيه (عس) قارشى قوجه طاشلر يوموشار، پارچهلانير. يا خشيتندن ويا سرورندن آغلايهرق سيل گبى ياش آقيتديغى حالده، هانگى إنصافله بتون معجزاتِ موسويهيه (عس) قارشى تمرّد ايدهرك آغلامهيوب، گوزيڭز جمود و قلبڭز قاتيلق ايدييور.