يگرمنجى سوز
(ايكى مقامدر)
برنجى مقام
﴿بِسْمِ اللّٰهِ الرَّحْمٰنِ الرَّحٖيمِ﴾
﴿وَاِذْ قُلْنَا لِلْمَلٰٓئِكَةِ اسْجُدُوا لِاٰدَمَ فَسَجَدُٓوا اِلَّٓا اِبْلٖيسَ ۞
اِنَّ اللّٰهَ يَاْمُرُكُمْ اَنْ تَذْبَحُوا بَقَرَةً ۞
ثُمَّ قَسَتْ قُلُوبُكُمْ مِنْ بَعْدِ ذٰلِكَ فَهِىَ كَالْحِجَارَةِ اَوْ اَشَدُّ قَسْوَةً﴾
بر گون شو آيتلرى اوقوركن إبليسڭ إلقاآتنه قارشى قرآنِ حكيمڭ فيضندن اوچ نكته إلهام ايديلدى. وسوسهنڭ صورتى شودر:
ديدى كه: «ديرسڭز: قرآن معجزهدر. هم نهايتسز بلاغتدهدر. هم، عمومه هر وقتده هدايتدر. حالبوكه، شويله بعض حادثاتِ جزئيهيى تاريخوارى بر صورتده مصرّانه تكرار ايتمكده نه معنا وار؟ بر اينگى كسمك گبى بر واقعۀِ جزئيهيى، او قدر مهمّ توصيفات ايله بويله ذكر ايتمك، حتّى او سورۀِ عظيمهيه ده (اَلْبَقَرَة) تسميه ايتمكده نه مناسبت وار؟ هم ده آدمه سجده اولان حادثه، صِرف بر أمرِ غيبيدر. عقل اوڭا يول بولاماز. قوى بر ايماندن صوڭره تسليم و إذعان ايديلهبيلير.