قارشىيه گلوب، بر وضعيتده و مهيّج بر زمانده، هر ذكر و تسبيح، بتون معناسنڭ طبقاتنى طورفانده و طراوتلى و تازه و گنج بر صورتده إفاده ايتديگى گبى؛ او إنقلابِ عظيمڭ طرّاقهسى آلتنده اولان إنسانلرڭ بتون حسّياتنى، لطائفِ معنويهسنى اويانديرمش؛ حتّى وهم و خيال و سرّ گبى طويغولر هشيار و متيقّظ بر صورتده او ذكر، او تسبيحلردهكى متعدّد معنالرى كندى ذوقلرينه گوره آلير، أمر. ايشته شو حكمته بناءً بتون حسّياتلرى اويانيق و لطائفلرى هشيار اولان صحابهلر، أنوارِ ايمانيه و تسبيحيهيى جامع اولان كلماتِ مباركهيى ديدكلرى وقت، كلمهنڭ بتون معناسيله سويلر و بتون لطائفيله حصّه آليرلردى. حالبوكه او إنفلاق و إنقلابدن صوڭره، گيت گيده لطائف اويقويه و حواس او حقائق نقطهسنده غفلته دوشوب، او كلماتِ مباركه، ميوهلر گبى گيت گيده، الفت پردهسيله لطافتنى و طراوتنى غيب ايدر. عادتا سطحيلك هواسيله قورويور گبى، آز بر ياشلق قالييور كه؛ قوّتلى، تفكّرى بر عملياتله، آنجق أوّلكى حالى إعاده ايديلهبيلير. ايشته بوندندر كه، قرق دقيقهده بر صحابهنڭ قزانديغى فضيلته و مقامه، قرق گونده، حتّى قرق سنهده باشقهسى آنجق يتيشهبيلير.
اوچنجى سبب:
اون ايكنجى و يگرمى دردنجى و يگرمى بشنجى سوزلرده إثبات ايديلديگى گبى، نبوّتڭ ولايته نسبتى، گونشڭ عينِ ذاتيله، آيينهلرده گورولن گونشڭ مثالى گبيدر. ايشته دائرۀِ نبوّت، دائرۀِ ولايتدن نه قدر يوكسك ايسه، دائرۀِ نبوّتڭ خدمهلرى و او گونشڭ ييلديزلرى اولان صحابهلر دخى، دائرۀِ ولايتدهكى صلحايه او درجه تفوّقى اولمق لازم گلييور. حتّى ولايتِ كبرا اولان وراثتِ نبوّت و صدّيقيت كه، صحابهلرڭ ولايتيدر؛ بر ولى قزانسه، ينه صفِّ أوّل اولان صحابهلرڭ مقامنه يتيشمز. شو اوچنجى سببڭ متعدّد وجوهندن اوچ وجهنى بيان ايدرز: