ايچون بعض باصامقلرى، هم او جنّتِ قرآنيهدن نمونه ايچون بعض چيچكلرڭ نمونهسى نوعندن بعض نكتهلرى سويلهيهجگز. بش رموزلى سؤال و جوابله إشارت ايدهجگز. أوت، جنّت بتون لذائذِ معنويهيه مدار اولديغى گبى، بتون لذائذِ جسمانيهيه ده مداردر.
سؤال:
قصورلى، نقصانيتلى، متغيّر، قرارسز، ألملى جسمانيتڭ أبديتله و جنّتله نه علاقهسى وار؟ مادام روحڭ عالى لذائذى واردر؛ اوڭا كافيدر. لذائذِ جسمانيه ايچون، بر حشرِ جسمانى نهدن ايجاب ايدييور؟
الجواب:
چونكه ناصل طوپراق صويه، هوايه، ضيايه نسبةً كثافتلى، قراڭلقليدر؛ فقط مصنوعاتِ إلٰهيهنڭ بتون أنواعنه منشأ و مدار اولديغندن بتون عناصرِ سائرهنڭ معنًا فوقنه چيقديغى گبى.. هم كثافتلى اولان نفسِ إنسانيه؛ سرِّ جامعيت إعتباريله، تزكّى ايتمك شرطيله بتون لطائفِ إنسانيهنڭ فوقنه چيقديغى گبى.. اويله ده، جسمانيت؛ أڭ جامع، أڭ محيط، أڭ زنگين بر آيينۀِ تجلّياتِ أسماءِ إلٰهيهدر. بتون خزائنِ رحمتڭ مدّخراتنى طارتهجق و ميزانه چكهجك آلَتلر، جسمانيتدهدر. مثلا: ديلدهكى قوّۀِ ذائقه، رزق ذوقنده أنواعِ مطعومات عددنجه ميزانلره منشأ اولماسه ايدى؛ هر برينى آيرى آيرى حسّ ايدوب طانيمازدى، طاتوب طارتامازدى. هم أكثر أسماءِ إلٰهيهنڭ تجلّياتنى حسّ ايدوب بيلمك، ذوق ايدوب طانيمق جهازاتى، ينه جسمانيتدهدر. هم غايت متنوّع و نهايت درجهده آيرى آيرى لذّتلرى حسّ ايدهجك إستعدادلر، ينه جسمانيتدهدر. مادام شو كائناتڭ صانعى، شو كائناتله بتون خزائنِ رحمتنى طانيتديرمق و بتون تجلّياتِ أسماسنى بيلديرمك و بتون أنواعِ إحساناتنى طاتديرمق ايستديگنى؛ كائناتڭ گيديشاتندن و إنسانڭ جامعيتندن، (اون برنجى سوزده إثبات ايديلديگى گبى) قطعى آڭلاشيلييور. ألبته شو سَيْلِ كائناتڭ بر حوضِ أكبرى و بو كائنات تزگاهنڭ