فائدهلى بر حسنِ نقش گوسترهرك صانعِ ذو الجلالڭ مدايحنه بر قصيدۀِ مدحيه گبى بر أثر گوسترر. مثلا، نار و مصره دقّت ايت.
أوت تحوّلاتِ ذرّات؛ (حاشيه) عالمِ غيبدن اولان، هر شيئڭ گچمش أصلنده و گلهجك نسلندهكى إنتظاماته مدار و علم و أمرِ إلٰهينڭ بر عنوانى اولان «إمامِ مبين»ڭ دستورلرى و إملاسى تحتنده و زمانِ حاضر و عالمِ شهادتدن، تشكيل و ايجادِ أشياده تصرّفه مدار و قدرت و إرادۀِ إلٰهيهنڭ بر عنوانى اولان «كتابِ مبين»دن إستنساخ ايله و سيّال زمانڭ حقيقتى و صحيفۀِ مثاليهسى اولان «لوحِ محو إثبات»ده كلماتِ قدرتى يازمق و چيزمكدن گلن حركاتدر و معنيدار إهتزازاتدر.
___
(حاشيه): ايكنجى مقصدڭ تحوّلاتِ ذرّاتڭ تعريفنه دائر اولان اوزون جملهنڭ حاشيهسيدر.
قرآنِ حكيمده «إمامِ مبين» و «كتابِ مبين»، مكرّر يرلرده ذكر ايديلمشدر. أهلِ تفسير، «ايكيسى بردر»؛ بر قسمى، «آيرى آيريدر» ديمشلر. حقيقتلرينه دائر بياناتلرى مختلفدر. خلاصه: «علمِ إلٰهينڭ عنوانلريدر» ديمشلر. فقط قرآنڭ فيضى ايله شويله قناعتم گلمش كه:
«إمامِ مبين»، علم و أمرِ إلٰهينڭ بر نوعنه بر عنواندر كه، عالمِ شهادتدن زياده عالمِ غيبه باقييور. يعنى زمانِ حالدن زياده ماضى و مستقبله نظر ايدر. يعنى، هر شيئڭ وجودِ ظاهريسندن زياده أصلنه، نسلنه و كوكلرينه و تخملرينه باقار. قدرِ إلٰهينڭ بر دفتريدر. شو دفترڭ وجودى، يگرمى آلتنجى سوزده، هم اوننجى سوزڭ حاشيهسنده إثبات ايديلمشدر. أوت شو «إمامِ مبين»، بر نوع علم و أمرِ إلٰهينڭ بر عنوانيدر. يعنى، أشيانڭ مباديلرى و كوكلرى و أصللرى، كمالِ إنتظام ايله أشيانڭ وجودلرينى غايت صنعتكارانه إنتاج ايتمهسى جهتيله ألبته دساتيرِ علمِ إلٰهينڭ بر دفترى ايله تنظيم ايديلديگنى گوسترييور و أشيانڭ نتيجهلرى، نسللرى، تخملرى؛ ايلريده گلهجك موجوداتڭ پروغراملرينى، فهرستهلرينى تضمّن ايتدكلرندن ألبته أوامرِ إلٰهيهنڭ بر كوچك مجموعهسى اولديغنى بيلديرييورلر. مثلا: بر چكردك بتون آغاجڭ تشكيلاتنى تنظيم ايدهجك اولان پروغراملرى و فهرستهلرى و او فهرسته