هر طائفهدن، هر فرددن، هر شيدن، كندينى گوسترهجك يعنى وجودينى و وحدتنى بيلديرهجك پنجرهلر آچمش. هر قلب ايچنده بر تلفون بيراقمش. شيمدى شو حدسز پنجرهلردن ألبته حدّيمزڭ فوقنده اولارق بحثه گيريشميهجگز. اونلرى علمِ محيطِ إلٰهىيه حواله ايدوب، يالڭز آياتِ قرآنيهنڭ لمعاتى اولان اوتوز اوچ پنجرهيى اوتوز اوچنجى سوزڭ اوتوز اوچنجى مكتوبنڭ نمازدن صوڭرهكى تسبيحاتڭ اوتوز اوچ عددِ مباركنه موافق اولمق ايچون اوتوز اوچ پنجرهيه إجمالى و مختصر بر صورتده إشارت ايدوب، ايضاحنى سائر سوزلره حواله ايدرز...
برنجى پنجره
بِالمشاهده گورويورز كه: بتون أشيا، خصوصًا ذىحيات اولانلرڭ پك چوق مختلف حاجاتى و پك چوق متنوّع مطالبى واردر. او مطلبلرى، او حاجتلرى، اومماديغى و بيلمديگى و ألى يتيشمديگى يردن مناسب و لايق بر وقتده اونلره ويريلييور، إمداده يتيشديريلييور. حالبوكه او حدسز مقصودلرڭ أڭ كوچگنه او محتاجلرڭ قدرتى يتيشمز، أللرى اولاشماز. سن كنديڭه باق: ظاهرى و باطنى حاسّهلرڭ و اونلرڭ لوازماتى گبى ألڭ يتيشمديگى نه قدر أشيايه محتاجسڭ. بتون ذىحياتلرى كنديڭه قياس ايت. ايشته بتون اونلر، برر برر، وجودِ واجبه شهادت و وحدتنه إشارت ايتدكلرى گبى، هيئتِ مجموعهسيله، گونشڭ ضياسى گونشى گوسترديگى گبى، او حال و بو كيفيت، پردۀِ غيب آرقهسنده بر واجب الوجودى، بر واحدِ أحدى، هم غايت كريم، رحيم، مربّى، مدبّر عنوانلرى ايچنده عقله گوسترر.
شيمدى أى منكِر جاهل و أى فاسق غافل! بو فعاليتِ حكيمانهيى، بصيرانهيى، رحيمانهيى نه ايله ايضاح ايدهبيليرسڭ؟ صاغير طبيعتله مى، كور قوّتله مى، سرسم تصادفله مى، عاجز جامد أسبابله مى ايضاح ايدهبيليرسڭ؟...