وظيفۀِ شكرانيهسى، بر لذّتى واردر. ألبته مكافاتى دخى واردر. مثلا ديلدهكى قوّۀِ ذائقه، بتون مطعوماتڭ أذواقنى آڭلامقله غايت متنوّع بر شكرِ معنوى ايله وظيفه گورور و هكذا... بتون جهازاتِ إنسانيهنڭ و قلب و عقل و روح گبى بيوك و مهمّ لطائفڭ بويله آيرى آيرى وظيفهلرى، لذّتلرى و ألملرى واردر. ايشته جنابِ حق و حكيمِ مطلق، بو إنسانده إستخدام ايتديگى بو جهازاتڭ ألبته هر بررلرينه لايق اجرتلرينى ويرهجكدر.
او متعدّد أنواعِ محبّتڭ سابقًا بيان ايديلن دنيادهكى معجّل نتيجهلرينى، هركس وجدان ايله حسّ ايدر و بر حدسِ صادق ايله إثبات ايديلير. آخرتدهكى نتيجهلرى ايسه؛ قطعيًا وجودلرى و تحقّقلرى، إجمالًا اوننجى سوزڭ اون ايكى حقيقتِ قاطعۀِ ساطعهسيله و يگرمى طوقوزنجى سوزڭ آلتى أساسِ باهرهسيله إثبات ايديلديگى گبى، تفصيلًا
﴿اَصْدَقُ الْكَلَامِ وَاَبْلَغُ النِّظَامِ كَلَامُ اللّٰهِ الْمَلِكِ الْعَزٖيزِ الْعَلَّامِ﴾
اولان قرآنِ حكيمڭ آياتِ بيّناتيله تصريح و تلويح و رمز و إشاراتيله قطعيًا ثابتدر. داها اوزون برهانلرى گتيرمگه لزوم يوق. ذاتًا باشقه سوزلرده و جنّته دائر يگرمى سكزنجى سوزڭ عربى اولان ايكنجى مقامنده و يگرمى طوقوزنجى سوزده چوق برهانلر گچمشدر.
برنجى إشارت:
لذيذ طعاملره، خوش ميوهلره شاكرانه محبّتِ مشروعهنڭ اُخروى نتيجهسى، قرآنڭ نصّيله، جنّته لايق بر طرزده لذيذ طعاملرى، گوزل ميوهلريدر. و او طعاملره و او ميوهلره مشتهيانه بر محبّتدر. حتّى دنياده يديگڭ ميوه اوستنده سويلهديگڭ «الحمد لِلّٰه» كلمهسى، جنّت ميوهسى اولارق تجسّم ايتديريلوب سڭا تقديم ايديلير. بوراده ميوه يرسڭ، اوراده «الحمد لِلّٰه» يرسڭ. و نعمتده و طعام ايچنده إنعامِ إلٰهىيى و إلتفاتِ رحمانىيى گورديگڭدن او لذّتلى شكرِ معنوى، جنّتده غايت لذيذ بر طعام صورتنده سڭا ويريلهجگى، حديثڭ نصّيله، قرآنڭ إشاراتيله و حكمت و رحمتڭ إقتضاسيله ثابتدر.