ايشته (اَحْسَنُ الْخَالِقٖينَ) (اَرْحَمُ الرَّاحِمٖينَ) (اَللّٰهُ اَكْبَرُ) معانيسى، شو معنايه ده باقييور.
وكيلڭ ايكنجى شق سؤالنه «بش رمز» ايله جوابدر:
برنجى رمز:
سؤالده دييور كه: «بر شيئڭ ضدّى اولمازسه، او شيئڭ ناصل كمالى اولابيلير؟»
الجواب: شو سؤال صاحبى، حقيقى كمالى بيلمييور. يالڭز نسبى بر كمال ظن ايدييور. حالبوكه غيره باقان و غيره نسبةً حاصل اولان مزيتلر، فضيلتلر، تفوّقلر؛ حقيقى دگللر، نسبىدرلر، ضعيفدرلر. أگر غير، نظردن ساقط اولسهلر؛ اونلر ده سقوط ايدرلر. مثلا: صيجاقلغڭ نسبى لذّتى و فضيلتى، صوغوغڭ تأثيرى ايلهدر. يمگڭ نسبى لذّتى، آجلق ألمنڭ تأثيرى ايلهدر. اونلر گيتسه، بونلر ده آزالير. حالبوكه حقيقى لذّت و محبّت و كمال و فضيلت اودر كه؛ غيرڭ تصوّرينه بنا ايديلمسين، ذاتنده بولونسون و بِالذّات بر حقيقتِ مقرّره اولسون. لذّتِ وجود و لذّتِ حيات و لذّتِ محبّت و لذّتِ معرفت و لذّتِ ايمان و لذّتِ بقا و لذّتِ رحمت و لذّتِ شفقت و حسنِ نور و حسنِ بصر و حسنِ كلام و حسنِ كرم و حسنِ سيرت و حسنِ صورت و كمالِ ذات و كمالِ صفات و كمالِ أفعال گبى بِالذّات مزيتلر؛ غير اولسون اولماسين، شو مزيتلر تبدّل ايتمز.
ايشته صانعِ ذو الجلال و فاطرِ ذو الجمال و خالقِ ذو الكمالڭ بتون كمالاتى حقيقيهدر، ذاتيهدر؛ غير و ماسوا، اوڭا تأثير ايتمز. يالڭز مظاهر اولابيليرلر.