حدودلرندن تجاوز ايتمهمهلرى، بر عاشرۀِ دقيقه قدر وظيفهلرندن گرى قالماملرى، صانعِ ذو الجلاللرينڭ نه قدر دقيق بر ميزانِ مخصوص ايله ربوبيتنى إجرا ايتديگنى نظرِ دقّته گوستررلر. هم ده شو آيت گبى سورۀِ عَمَّده و سائر آيتلرده بيان اولونان تسخيرِ شمس و قمر و نجومله إشارت ايتديگى گبى:
﴿تَشَعْشُعُ سِرَاجِهَا تَهَلْهُلُ مِصْبَاحِهَا تَلَئْلُؤُ نُجُومِهَا تُعْلِنُ لِاَهْلِ النُّهٰى سَلْطَنَةً بِلَا اِنْتِهَاءٍ﴾
يعنى: سمانڭ مزيَّن طاواننه، گونش گبى ايشيق ويريجى، ايصينديريجى بر لامبايى طاقمق؛ گيجه گوندوز خطلريله، قيش ياز صحيفهلرنده مكتوباتِ صمدانيهيى يازماسنه بر نور حقّهسى حكمنه گتيرمك و يوكسك مناره و قلهلردهكى بيوك ساعتلرڭ پارلايان عقربلرى مِثللو، قبّۀِ سماده قمرى، زمانڭ ساعتِ كبراسنه بر عقرب ياپمق؛ متفاوت چوق هلاللر صورتنده هر گيجهيه گويا آيرى بر هلال بيراقوب، صوڭره دونوب كندينه طوپلامق، منزللرنده كمالِ ميزانله، دقيق حسابله حركت ايتديرمك و قبّۀِ سماده پارلايان، تبسّم ايدن ييلديزلرله، گوگڭ گوزل يوزينى يالديزلامق، ألبته نهايتسز بر سلطنتِ ربوبيتڭ شعائريدر. ذىشعوره، اونى إشعار ايدن محتشم بر الوهيتڭ إشاراتيدر. أهلِ فكرى، ايمانه و توحيده دعوت ايدر.
باق كتابِ كائناتڭ صفحۀِ رنگيننه
خامۀِ زرّينِ قدرت، گور نه تصوير أيلهمش.
قالمامش بر نقطۀِ مظلم، چشمِ دل أربابنه
صانكه آياتن خدا، نور ايله تحرير أيلهمش.
باق، نه معجزِ حكمت، إذعانرباىِ كائنات؛
باق، نه عالى بر تماشادر فضاىِ كائنات؛