بولونوب لسانلريله بشره درس ويرن و هيچ بر كتابده أمثالى بولونميان بر طرزده، بشر ايچون حياتِ باقيهيى و سعادتِ أبديهيى مژده ويرن و بتون بشرڭ يارهلرينى تداوى ايدن قرآنِ معجز البيانڭ شدّتلى، قوّتلى و تكرارلى بيڭلر آياتيله، بلكه صريحًا و إشارةً اون بيڭلر دفعه دعوا ايدوب خبر ويرن و صارصيلماز قطعى دليللرله، شبهه گتيرمز حدسز حجّتلريله حياتِ باقيهيى قطعيتله مژده و سعادتِ أبديهيى درس ويرمهسى، ألبته نوعِ بشر بتون بتون عقلنى غائب ايتمزسه، مادّى ويا معنوى بر قيامت باشلرينه قوپمازسه؛ إسوهچ، نوروهچ، فينلانديا و إنگلترهنڭ قرآنى قبول ايتمگه چاليشان مشهور خطيبلرى و آمريقانڭ دينِ حقّى آرايان أهمّيتلى جمعيتى گبى روىِ زمينڭ گنيش قطعهلرى و بيوك حكومتلرى قرآنِ معجز البيانى آراياجقلر و حقيقتلرينى آڭلادقدن صوڭره بتون روح و جانلريله صاريلاجقلر. چونكه بو حقيقت نقطهسنده قطعيًا قرآنڭ مِثلى يوقدر و اولاماز و هيچ بر شى بو معجزۀِ أكبرڭ يرينى طوتاماز.
ثانيًا: مادام رسالۀِ النور، بو معجزۀِ كبرانڭ ألنده بر ألماس قلنج حكمنده خدمتنى گوسترمش و معنّد دشمنلرينى تسليمه مجبور ايتمش. هم قلبى، هم روحى، هم حسّياتى تام تنوير ايدهجك و علاجلرينى ويرهجك بر طرزده خزينۀِ قرآنيهنڭ دلاّللغنى ياپان و اوندن باشقه مأخذى و مرجعى اولميان و بر معجزۀِ معنويهسى بولونان رسالۀِ النور او وظيفهيى تام ياپييور و عليهندهكى دهشتلى پروپاغندهلره و غايت معنّد زنديقلره تام غلبه چالمش و ضلالتڭ أڭ سرت قوّتلى قلعهسى اولان طبيعتى، طبيعت رسالهسيله پارچه پارچه ايتمش و غفلتڭ أڭ قالين و بوغوجى و گنيش دائرۀِ آفاقنده و فنّڭ أڭ گنيش پردهلرنده عصاىِ موسىدهكى ميوهنڭ آلتنجى مسئلهسى و برنجى، ايكنجى، اوچنجى، سكزنجى حجّتلريله غايت پارلاق بر طرزده غفلتى طاغيتوب، نورِ توحيدى گوسترمش.
* * *