تخريب ايدييورسڭ و كفرانڭله إبطال ايدييورسڭ و تملّكله غصب ايدييورسڭ. سنڭ وظيفهڭ فخر دگل، شكردر. سڭا لايق اولان شهرت دگل، تواضعدر، خجالتدر. سنڭ حقّڭ مدح دگل إستغفاردر، ندامتدر. سنڭ كمالڭ خودبينلك دگل، خدابينلكدهدر.
أوت سن بنم جسممده، عالمدهكى طبيعته بڭزرسڭ. ايكيڭز، خيرى قبول ايتمك، شرّه مرجع اولمق ايچون ياراديلمشسڭز. يعنى فاعل و مصدر دگلسڭز، بلكه منفعل و محلسڭز. يالڭز بر تأثيريڭز وار: او ده خيرِ مطلقدن گلن خيرى، گوزل بر صورتده قبول ايتمهمڭزدن شرّه سبب اولماڭزدر. هم سز برر پرده ياراديلمشسڭز. تا گوزللگى گورولمهين ظاهرى چركينلكلر سزه إسناد ايديلوب، ذاتِ مقدّسۀِ إلٰهيهنڭ تنزيهنه وسيله اولاسڭز. حالبوكه بتون بتون وظيفۀِ فطرتڭزه ضد بر صورت گيمشسڭز. قابليتسزلگڭزدن خيرى شرّه قلب ايتديگڭز حالده، خالقڭزله گويا إشتراك ايدرسڭز. ديمك نفسپرست، طبيعتپرست غايت أحمق، غايت ظالمدر.
هم ديمه كه: «بن مظهرم. گوزله مظهر ايسه، گوزللشير.» زيرا، تمثّل ايتمديگندن مظهر دگل، ممرّ اولورسڭ.
هم ديمه كه: «خلق ايچنده بن إنتخاب ايديلدم. بو ميوهلر بنم ايله گوستريلييور. ديمك بر مزيتم وار.» خاير، حاشا! بلكه هركسدن أوّل سڭا ويريلدى؛ چونكه هركسدن زياده سن مفلس و محتاج و متألّم اولديغڭدن أڭ أوّل سنڭ ألڭه ويريلدى. (حاشيه)
___
(حاشيه): حقيقةً بن ده بو مناظرهده يڭى سعيد، نفسنى بو درجه إلزام و إسكات ايتمسنى چوق بگندم و «بيڭ بارك اللّٰه» ديدم.