اون دردنجى سوزڭ ذيلى
﴿بِسْمِ اللّٰهِ الرَّحْمٰنِ الرَّحٖيمِ﴾
﴿اِذَا زُلْزِلَتِ الْاَرْضُ زِلْزَالَهَا ۞ وَاَخْرَجَتِ الْاَرْضُ اَثْقَالَهَا
۞ وَقَالَ الْاِنْسَانُ مَالَهَا ۞ يَوْمَئِذٍ تُحَدِّثُ اَخْبَارَهَا ۞
بِاَنَّ رَبَّكَ اَوْحٰى لَهَا … الخ﴾
شو سوره قطعيًا إفاده ايدييور كه: كُرۀِ أرض، حركت و زلزلهسنده وحى و إلهامه مظهر اولارق أمر تحتنده تپرهنيور. بعضًا ده تيترهيور.
(معنوى و أهمّيتلى بر جانبدن شيمديكى زلزله مناسبتيله آلتى يدى جزئى سؤاله قارشى ينه معنوى إخطار يارديميله جوابلرى قلبه گلدى. تفصيلًا يازمق قاچ دفعه نيّت ايتدمسه ده إذن ويريلمدى. يالڭز إجمالًا قيصهجق يازيلاجق.)
برنجى سؤال: بو بيوك زلزلهنڭ مادّى مصيبتندن داها أليم معنوى بر مصيبتى اولارق، شو زلزلهنڭ دوامندن گلن قورقو و مأيوسيت أكثر خلقڭ أكثر مملكتده گيجه إستراحتنى سلب ايدهرك دهشتلى بر عذاب ويرمهسى نهدندر؟
ينه معنوى جواب: شويله دينلدى كه: رمضانِ شريفڭ تراويح وقتنده كمالِ نشئه و سُرور ايله سرخوشجهسنه غايت هوسكارانه شرقيلرى و بعضًا قيزلرڭ سسلريله راديو آغزيله بو مبارك مركزِ إسلاميتڭ هر كوشهسنده جاذبهدارانه ايشيتديرلمسى، بو قورقو عذابنى نتيجه ويردى.