دگل. چونكه أوّلكى خدمتكار، يگرمى آلتونله أڭ أعلا قوماشدن بر قات لباس آلمش اولديغندن، ألبته بو بيڭ آلتون، بر قات لباسه صرف ايديلمز. شايد بو ايكنجى خدمتكار، جيبنه قونيلان كاغدى اوقومايوب، بلكه أوّلكى خدمتجىيه باقوب، بتون پارهيى بر دكّانجىيه بر قات لباس ايچون ويروب، هم او قوماشڭ أڭ چوروگندن و آرقداشنڭ لباسندن أللى درجه آشاغى بر لباس آلسه، ألبته او خادم نهايت درجهده أحمقلق ايتمش اولاجغى ايچون شدّتله تعذيب و حدّتله تأديب ايديلهجكدر.
أى نفسم و أى آرقداشم! عقلڭزى باشڭزه طوپلايڭز. سرمايۀِ عمر و إستعدادِ حياتڭزى حيوان گبى، بلكه حيواندن چوق آشاغى بر درجهده شو حياتِ فانيه و لذّتِ مادّيهيه صرف ايتمهيڭز. يوقسه سرمايهجه أڭ أعلا حيواندن أللى درجه يوكسك اولديغڭز حالده، أڭ أدناسندن أللى درجه آشاغى دوشرسڭز.
أى غافل نفسم! سنڭ حياتڭڭ غايهسنى و حياتڭڭ ماهيتنى، هم حياتڭڭ صورتنى، هم حياتڭڭ سرِّ حقيقتنى، هم حياتڭڭ كمالِ سعادتنى بر درجه آڭلامق ايسترسهڭ، باق:
سنڭ حياتڭڭ غايهلرينڭ إجمالى طوقوز أمردر:
برنجيسى شودر كه: سنڭ وجودڭده قونيلان طويغولر ترازيلريله، رحمتِ إلٰهيهنڭ خزينهلرنده إدّخار ايديلن نعمتلرى طارتمقدر و كلّى شكر ايتمكدر.
ايكنجيسى: سنڭ فطرتڭده وضع ايديلن جهازاتڭ آناختارلريله أسماءِ قدسيۀِ إلٰهيهنڭ گيزلى دفينهلرينى آچمقدر، ذاتِ أقدسى او أسما ايله طانيمقدر.