اوچنجى شعاع:
أى حدّندن تجاوز ايتمش نفسِ پروسواس! دييورسڭ كه:
﴿بِيَدِهٖ مَلَكُوتُ كُلِّ شَىْءٍ ۞ مَا مِنْ دَٓابَّةٍ اِلَّا هُوَ اٰخِذٌ بِنَاصِيَتِهَا ۞وَنَحْنُ اَقْرَبُ اِلَيْهِ مِنْ حَبْلِ الْوَرٖيدِ﴾
گبى آيتلر، نهايت درجهده قربيتِ إلٰهيهيى گوسترييور.
﴿وَاِلَيْهِ تُرْجَعُونَ ۞ تَعْرُجُ الْمَلٰٓئِكَةُ وَالرُّوحُ اِلَيْهِ فٖى يَوْمٍ كَانَ مِقْدَارُهُ خَمْسٖينَ اَلْفَ سَنَةٍ﴾
و حديثده وارد اولان: «جنابِ حق يتمش بيڭ حجاب آرقهسندهدر» و معراج گبى حقيقتلر، نهايت درجهده بعديتمزى گوسترييور. شو سرِّ غامضى فهمه تقريب ايدهجك بر ايضاح ايسترم.
الجواب: اويله ايسه ديڭله:
أوّلا، برنجى شعاعڭ آخرنده ديمشدك: ناصلكه گونش، قيدسز نوريله و مادّهسز عكسى جهتيله؛ سڭا، سنڭ روحڭ پنجرهسى و اونڭ آيينهسى اولان گوز ببگڭدن داها ياقين اولديغى حالده؛ سن، مقيّد و مادّهده محبوس اولديغڭ ايچون اوندن غايت اوزاقسڭ. اونڭ، يالڭز بر قسم عكسلريله، گولگهلريله تماس ايدهبيليرسڭ و بر نوع جلوهلريله و جزئى تجلّيلريله گوروشهبيليرسڭ و بر صنف صفتلرى حكمنده اولان ألوانلرينه و بر طائفه إسملرى حكمنده اولان شعاعلرينه و مظهرلرينه ياناشهبيليرسڭ. أگر، گونشڭ مرتبۀِ أصليسنه ياناشمق و بِالذّات طوغريدن طوغرىيه گونشڭ ذاتى ايله گوروشمك ايسترسهڭ، او وقت پك چوق قيدلردن تجرّد ايتمكلگڭ و پك چوق مراتبِ كلّيتدن گچمكلگڭ لازم گلير. عادتا سن، معنًا تجرّد جهتيله كُرۀِ أرض قدر بيويوب، هوا گبى روحًا إنبساط ايدوب و قمر قدر يوكسلوب، بدر گبى مقابل گلدكدن صوڭره بِالذّات پردهسز اونڭله گوروشوب، بر درجه ياناشمق دعوا ايدهبيليرسڭ. اويله ده: او جليلِ پر كمال، او جميلِ بىمثال، او واجب الوجود، او موجدِ كلِّ موجود، او شمسِ سرمد، او